Riba 22 April, Dia di Mama Tera, Fundacion Parke Nacional Aruba (FPNA) ta sigui cu su esfuerso pa conservacion di naturalesa cu e inauguracion di su Centro di Cultivo door di Minister Arends den presencia di team di FPNA y invitadonan. E Centro di Cultivo ta un inversion danki na fondonan di Prins Bernhard Cultuurfonds Caribisch Gebied y di donacion di Aruba Aiport Authority. E proyecto aki ta un ehempel biba di e tema di Earth Day 2022 cu ta ‘Inverti den Nos Planeta’.
Dia di Mama Tera ta un evento global pa demostra e importancia pa proteccion di nos medio ambiente. E tema di e di 52 Earth Day tabata pa ‘Inverti den Nos Planeta’, y tabata un yamada pa Gobierno y tambe sector priva pa contribui na proteccion, conservacion y sigur na restauracion di e estrado degrada di nos naturalesa. Como individuo y como comunidad, nos mester reconoce e impacto cu nos tin riba medioambiente, ecosistemanan y biodiversidad, y ahusta nos manera di biba pa por garantisa un naturalesa diverso y resiliente pa futuro.
Asina mes, e team di FPNA a cuminsa algun luna pasa pa traha riba e Proyecto di Centro di Cultivo cu siman pasa a wordo inaugura. E Centro di Cultivo ta e curason di FPNA su Programa di Mehoracion di Biodiversidad di Flora y pa un Clima Resiliente. E lugar di trabou ta ensera un banco di simianan, un workshop y un area pa cultiva mata, y un stacion di compost.
Na prome luga, e banco di semianan lo wordo utilisa pa sigura un cantidad di simia di mas cu 40 especie di mata y palonan nativo di Aruba y na peliger di extinccion. E semia nan lo wordo uza pa cultiva mata pero tambe pa salvaguardia e existencia genetico di e mata y palonan den caso di un malesa.
E lugar di trabou den e part yama como ‘Cas di Cultivo’ ta yuda hisa e probabilidad di fertilisacion y propagacion di matanan hoben nativo, mientras cu e area pa cultiva mata lo wordo uza como un area pa nan crece y wordo cuida un pa dos aña te cu e mata nan por sobrevivi den areanan di naturalesa protegi.
FPNA su manera integra pa conserva ta pone su enfoke riba e proteccion, preservacion y restauracion di Aruba su biodiversidad unico y tin como obhetivo pa mantene y avansa e condicion y sostenebilidad di cada categoria di servicionan di ecosistemanan. E especie nan di mata y palo nativo escogí pa wordo cultiva den e Cas di Cultivo ta basa riba nan scarsedad localmente y tambe nan balor ecologico pa especinan di fauna como Prikichi, Blenchi, raton di anochi, bei y barbulet. Cu e mata y palo nan escohi, FPNA lo hisa e biodiversidad y mehora e servicio di ecosistemanan.
E Centro di Cultivo lo tambe sirbi como un luga pa duna curso, bendemento di mata pa trese mas biodiversidad na hardinnan privado, guianan educacional, y oportunidad pa trabou voluntario pa e comunidad local y bishitantenan. Asina FPNA lo involvi comunidad den nos lucha pa conserva Aruba su flora nativo.
Siman pasa caba e Centro di Cultivo tabata tin su prome curso, caminda e participantenan di FPNA Junior Rangers Camp a yuda traha den e Cas di Cultivo, tambe tabata tin volunatrionan di e programa di Wings of Hope di e Aruba Aiport Authority cu a yuda cu trabou den e Cas di Cultivo. Cu esaki nos tin ehempelnan concreto con miembronan di e comunidad por yuda na conserva nos naturalesa.
Denter di e siguente lunanan, e stacion di compost lo wordo realiza bou guia di Compost Club Aruba y cu participacion di e comunidad. E stacion di compost lo wordo uza pa recicla material organico pa gordura den un manera sostenibel pa crea matanan mas saludabel y robusto prome cu nan sigi nan bida den naturalesa.
FPNA kier duna danki na Prins Bernhard Cultuur Fonds – Caribisch Gebied y Aruba Airport Authorities pa haci e proyecto bunita aki posibel. FPNA tambe kier agradeci tur e rangernan cu a yuda na construi e Centro di Cultivo aki. Esaki ta solamente e comienso y lo wordo amplia den futuro pa un isla y naturaleza rico y diverso.
FPNA lo sigui Inverti den Nos Naturalesa via e diferente programanan di monitoreo y restauracion di e areanan natural protegi, tanto terrestre, costal y marino, pa por logra un futuro caminda nos ta disfruta di un naturalesa mas rico, saludabel y diverso. FPNA ta invita pueblo di Aruba pa Inverti den Nos Planeta, pasobra un futuro yena cu naturalesa, ta un futuro prospero pa nos tur.
