Den cuadro di 15 aña di existencia, Fundacion Pa Nos Comunidad kier a para keto riba e importancia y continuo necesidad di nan existencia. Desde 2 di juli 2009 Fundacion Pa Nos Comunidad a wordo lanta como e unico banco di cuminda cu e vision y meta di yuda famianan mas vulnerabel di nos comunidad.
Desde su inicio fundacion no solamente a wordo estableci pa brinda ayudo cu alimento, pero tambe cu otro articulonan di primera necesidad. Fundacion ta keda un organisacion di cual su existencia no ta pa genera entrada sino ta keda depende riba fondo, donacion y subsidio (non-profit).
Actualmente fundacion ta brindando ayudo na +/-350 famia den necesidad cu ta registra pa asina ricibi pakete di alimento. E famianan aki ta biba den tur e districto riba nos isla.
Fundacion ta brinda asistencia cu paña, articulonan di cas manera: cashi di paña, cama, matras, frishider, stoof y otro articulonan. Den e aspecto di ayudo comunitario fundacion den su trayecto di existencia semper por a conta riba e sosten di su boluntarionan. Boluntarionan di diferente club social, scol, centro di bario, parokia, hotel, restaurant, wholesalers y otro companianan comercial. Durante tur e añanan di existencia, fundacion por a realisa hopi proyecto cu exito, cu e colaboracion di cada un boluntario cu a sa di duna nan tempo, energia y boluntad pa logra esaki.
Den cuadro di asistencia social fundacion tin 15 aña trahando hunto cu mas di 40 diferente organisacion social rond di Aruba. Organisacionnan cu tin diferente profesional riba e tereno social cu nan experticio por duna guia y sosten na famianan den necesidad. Organisacionnan manera Wit en Gele Kruis (WGK), Respaldo, Departamento di Asunto Social (DAS), Fundacion Cas Pa Comunidad Arubano (FCCA), Stichting Hunto, Bureau Sostenemi, Scolnan etc. Den transcurso di añanan FPNC como instancia cu ta fungi como ‘tweedelijn’, su trabao a bira uno sumamente importante debi cu e trabao no solamente ta uno den oficina, pero mas den field.
Den diferente caso FPNC ta haci bishita di cas y ta constata situacion di pobreza extremo. E situacionnan di pobreza cu mayoria di biaha tin mucha involucra aden, di cual mester a brinda ayudo inmediato pa por alivia e situacion.
Hopi caso den nos comunidad no ta haya e atencion debido, mirando cu nos ta keda biba den un comunidad chikito caminda hopi hende conoce otro. E sintimento di berguensa, orguyo y tambe falta di conocemento di ayudo social, ta stroba hopi hende pa tuma iniciativa pa bati na porta di instancia pa ayudo.
Fundacion semper a traha den forma profesional cu cliente den forma cu no ta distingui rasa, cultura, nacionalidad, religion of antecedente etnico. Cada situacion di pobreza tin un raiz di problema diferente, sea esaki ta problema di maneho di finansa, salud mental of adiccion, malesa cronico, separacion di famia, relacional y social emocional. Fundacion a bin ta ripara cu cada situacion ta diferente di cual ta rekeri su guia y sosten profesional. Na momento cu e Trahado Social constata cu tin mas pregunta di ayudo di cual ta rekeri un otro tipo di guia y sosten profesional, ta referi e cliente na e instancia concerni pa ayudo. Fundacion su ayudo ta keda uno temporal y na momento cu esaki bira uno structural lo referi cliente na un instancia cu ta traha como ‘eerstelijn’.
Den cuadro di participacion y reintegracion di cliente, fundacion a sa di brinda trayecto di participacion na diferente persona cu registra pa ayudo di pakete di alimento. Saliendo for di e punto di bista cu tin cu stimula e sostenibilidad di cada cliente. Teniendo na cuenta cu esaki lo stabilisa e situacion financiero cu lo brinda oportunidad na e clientenan pa por subi bek e mercado laboral. FPNC ta kere firmemente den brinda un segundo oportunidad na clientenan pa por provee pa nan mes y nan famia.
Durante e trayectorio di FPNC hopi trabao operacional lo no por a wordo realisa sin e sosten financiero di diferente comerciante, compania y patrocinado. Fundacion a sa di crea proyectonan social creativo y innovativo pa por a ricibi diferente fondo y donacion. Sin fondo fundacion no por a cubri su gastonan operacional pa 15 aña. Fundacion ta ehecutando diferente proyecto social cu ta enfoca riba salvaguardia bienestar general di cada grupo di meta, muchanan di scol, adulto y adulto mayor.
Comunidad di Aruba por haci donacion den e siguiente formanan:
– donacion di producto di alimento
– Articulonan di cas cu ta den bon estado
– Pañanan cu ta den bon estado
– Monetario na un di nos banconan.
Fundacion pa nos Comunidad Arubabank #1000 CMB #6000 1000 RBC#770 00 004 419 5025
Fundacion kier a gradici cada un trahado, boluntario, comerciante y patrocinado cu a contribui cu un granito di arena pa fundacion por a sigui crece. Sin lubida nos comunidad di Aruba den su totalidad cu semper a respalda Fundacion Pa Nos Comunidad. Boso donacion, tempo palabranan di gratitud, complimento y bon curason ta sigui inspira nos pa keda haci un bon trabao.
