Fundacion Diabetico Aruba tin un bunita programa pa entrena profesionalnan riba tereno di diabetes. Dr. Sharliene Vis a splica cu ta un programa pa siña pashentnan con pa anda cu e malesa cronico aki.
Dr. Vis a splica cu Fundacion Diabetico Aruba a wordo lanta na aña 1975 y te cu awe ainda e organisacion aki ta para pa e mesun balornan. Loke kier haci semper cu e fundacion, ta pa concientisa tur hende cu ta diabetico, of nan famianan, pero en general e pueblo riba e malesa aki.
Na 1975 cosnan tabata otro compara cu awendia. E tempo ey tabata mas enfoca riba e tratamento medico di e malesa aki.
Tabata importante pa tin tratamento den forma di remedi, insulina y pa tin e profesionalnan di cuido, manera dokter, cu sa di e malesa. Awendia esaki no ta suficiente. Mester mas pa anda cu e malesa di diabetes. Awe nos sa hopi mas di e causa di diabetes. Nos sa hopi mas di e factornan di riesgo cu ta haci cu e malesa di diabetes a bira eigenlijk un epidemia mundial.
Na Aruba tin ongeveer 10 pa 15 porciento di nos poblacion cu ta sufri di e malesa aki y ta wak hopi biaha cu e malesa aki no ta wordo bon trata, no pasobra e dokternan no ta haci nan trabao, pero tambe pasobra no ta haya e pashent motiva pa haci of no tin suficiente conocimento pa haci loke ta rekeri pa trata e malesa aki.
Esey e fundacion kier pone enfasis riba dje, pa educa e pashent, pa haci e pashent mas agil, con pa bay om cu e malesa ki.
No ta solamente pa sa kico e ta pero kico nan mes por haci tambe pa trata e factornan di riesgo. Manera tur hende sa, e factornan di riesgo importante, ta e estilo di bida, es decir, nos manera di come, nos manera di bay om cu stress, nos manera di movecion. Pasobra nos ta hiba un bida basta sedentario, den e añanan moderno aki. Ta cosnan cu tin cu cambia, no solamente pa preveni e malesa di diabetes, pero tambe e hende cu ta diabetico, con pa bay om cu e malesa. Con por haci pa e complicacionnan no bin. Esey ta loke cu kier purba ta pa percura pa e hendenan no yega den un fase cu ta bin complicacion.
Fundacion Diabetico ta pone hopi enfasis riba esaki.
Nan ta un grupo di 7 persona, profesional riba nan tereno, cu tin di haber cu un faseta di diabetes. Hunto ta purba di bin cu programanan, no solamente den forma di charla of training, of riba e dia di diabetes na November, ta pone enfoke.
Kier haci mas cu esey. Awor aki tin un programa hopi importante pa e profesionalnan den cuido, pero tambe pa e pashentnan, pa nan sigui anda miho cu e malesa.
