Hose Figaroa, abogado di sindicato FTA, tabata tey durante e walkout di e trahadonan di FCCA. E ta conta cu e situacion ta poco fastioso pa tanto e sindicato como e trahadonan pa basta tempo caba. Ta mas cu un aña a pasa cu nan a gana un referendum na FCCA. Gana un referendum despues cu FTA tin hopi aña caba den FCCA, sinembargo nunca a cera un CAO.
Semper a traha via un rechtspositieregeling. Pero como e forsa legal di esaki no ta mesun fuerte cu esun di un CAO, a dicidi dos aña pasa pa cuminsa cu e idea pa cambi’e pa un CAO, unda cu partidonan ta mara nan mes legalmente y cu e proteccion di e ley ta mas fuerte. A bay cu un referendum. FCCA no kier a negosha un CAO voluntariamente. Y lamentablemente a forsa pa bay un referendum, cual FTA a gana. A cuminsa purba despues cu FCCA.
lamentablemente, constantemente FTA a haya loke nan ta considera como tacticanan di retraso, unda cu cada biaha no ta sinta cu personanan cu por tuma decision. Cada biaha cu sinta mester bay bek na gerencia. Na momento cu bo ta sinta cu un hende cu por tuma decision, bo no mester bay bek cada biaha. Ta pasa lunanan prome cu ta bolbe bin cu un otro reunion.
FCCA hasta tuma un posicion cu ta exigi pa un cantidad substancial di miembro di FTA, no mag di ta miembro di sindicato. FTA a bisa cu esey no ta posibel. No ta mira ningun argumento pa exonera tanto hende asina for di un CAO. Supuestamente door di exigencianan di Banco Central, cual pa e sindicato ta ridiculo. Mirando cu FTA tin representacion den tur banco na Aruba, cual ta cay bao di e mesun supervision di Banco Central y no tin e tipo di exoneracion aki cu tin manera esaki. FTA no ta acepta esey.
A manda un carta bisando esey claramento y como respuesta a haya cu tanten cu FTA no bay di acuerdo pa exonera tur e miembronan ey, di nan banda nan no lo negosha mas.
Esey a hiba cu e trahadonan a sali afo, pasobra no ta acepta e tipo di tacticanan ey, simplemente e trahadonan a cansa di e situacion aki, unda cu no ta bay ni dilanti ni patras. Nan tin mas di un aña para mesun caminda, segun abogado Hose Figaroa.
