Casi shete mil persona estafa cu benta di entrada pa concierto di Daddy Yankee. E estafadornan a bende algun di e entradanan aki te cu 367 biaha y tabata influencer conoci tabata promociona esaki. E concierto di e cantante di reagueton Portoriqueño, Daddy Yankee. Asina Polis Nacional di Peru (PNP) a informa.
Hefe di Polis Regional di Lima, Manuel Lozada a splica n’e canal estatal TV Peru cu nan mester a retira “mas di shete mil persona cu tabata kier a drenta Estadio Nacional”, unda cu e concierto a tuma luga. Segun polis, motibo di esaki tabata pasobra cu nan ticket di entrada tabata bendi caba of cu a lesa e QR code di cada ticket caba.
Es decir, e mesun entrada e estafadornan a bend’e varios biaha y esunnan cu tabata cumpra e entrada, tabata bay stadion cu ne. Pero e sorpresa tabata grandi ora cu, na momento di drenta, nan tabata bin haya sa cu e QR code riba e ticket tabata registra caba, pa cual nan no por a drenta.
Segun e alto oficial di polis, nan tabata por a constata cu 367 persona a purba di drenta stadion cu e mesun QR code asocia c’un entrada. Esaki ta nifica cu “a bende e mesun ticket ey 367 biaha.”
El a bisa tambe cu, algun di esunnan estafa, a paga 4 mil sol (mas o menos mil dollar) pa dos entrada y “un meneer cu a cumpra dies entrada na 18 mil sol (mas o menos 4.500 dollar) a entrega un denuncia di estafa.” Segun e website oficial, e prijs di entrada tabata varia di 176 sol (mas o menos 44 dollar) pa 670 sol (168 dollar).
ARUBA
Aki na Aruba tambe tin un situacion similar tumando luga, caminda cu e promotornan Dushi Vibe Festival Aruba a promociona un concierto di Daddy Yankee na Aruba cu lo mester a tuma luga dia 4 di april 2020. Pero pa motibo di pandemia, mester a cancela dicho concierto.
Pero e promotor tras di esaki, Louis Luna, desde e tempo ey no a sali duna cara n’e publico cu a cumpra nan ticket di entrada pa tal concierto. Ya ta mas di dos aña caba cu a cancela e concierto y te dia di awe cu nos ta na october 2022, no ta tende nada mas.
Aruba ta conoci pa su hospitalidad y su carisma, pero tambe pa su hendenan di bon curason. Pero esey si, no hunga demasiado cu su pasenshi, ya cu eynan, ta otro gay ta canta. Loke e fanaticonan di Daddy Yankee aki na Aruba kier sa, ki dia e concierto aki lo tuma luga, cual ta existi hopi duda cu esaki lo tuma luga, ya cu segun e website oficial di Daddy Yankee, di awo pa su final di su gira, Aruba no ta riba plan pa duna un concierto.
Segun e mesun Facebook page di Aruba Dushi Vibe Festival, nan lo tabata “trahando” riba un fecha pa e gran concierto di Daddy Yankkee. Y e ultimo post ta di 20 di maart, esey kiermen, casi dos aña despues di cu e concierto mester a tuma luga, ta bin tira santo den wowo di e fanaticonan cu, prome cu e cantante retira, e lo tene su concierto na Aruba.
Loke e fanaticonan di e cantante kier scucha for di e promotornan ta unda y ki dia nan ta haya nan placa bek! Nan tin mas di shen mil florin den nan posesion di e placa cu e publico a paga pa nan entrada Aña 2022 ta cabando y ainda no tin solucion p’esaki!
