Antes e tramnan tabata yega banda di Plaza Nikki Habibe, unda ta lora y bin bek abou. E turistanan tabata yega te eynan y despues bin bek abou. Pero awo e tram no ta yega eybanda.
Frank Tieleman, comerciante, a splica cu antes e tram tabata yega lora cerca di Chubato Beer World Aruba, pero awo no mas. Antes e tabata trece e hendenan n’e negoshinan cerca di e plaza. E ta un sla duro pa e negociantenan n’e pida ey di Caya Grandi. Nan tabata positivo y a prepara tur cos pa december, pero e noticia di tram cu den cinco dia nan ta stop y ta yega solamente te Plaza Daniel Leo. A bisa cu e turistanan lo cana, pero nan no ta yega na Chubato Beer pasobra e ta hopi leu. Tambe a bisa cu auto lo pasa den Caya Grandi, pero nan no por pasa dilanti su luga pasobra eynan ta verboden.
E seccion banda di Plaza Nikki Habibe, unda ex-RBC tabata te skina di Djispies y botica ta muriendo, pasobra no tin fluho. E noticia a dal basta duro, pasobra e tabatin plan y Tieleman a inverti hopi placa. Den cinco dia e no por a haci nada y a cuminsa kita hende fo’i trabou. P’e motibo ey ta pusha pa tin actividad pa fin di aña p’e localnan corda cu Chubato tambe ta den Caya Grandi. E turista cu tabata yega cerca nan awo no ta nada. E luga ta basa riba tanto turista como local.
Pa tres aña largo e tramnan tabata pasa dilanti nan cu yen turista y a adapta e negoshi p’esey. Pero di anochi pa mainta a dicidi di stop e tram. A bisa cu ta haci esey temporal, esta pa cuater luna. Segun Tieleman, pa cuater luna ningun hende ta bay wanta. El a sigui splica cu den di e negoshi Chubato, el a perde 50% di benta. E ta un sla hopi grandi p’e.
Nan ta busca otro manera pa haya hende y un di nan ta local. Pa hende local yega Caya Grandi ta door di haci actividad y tur diabierna anochi ta haci esey. Pero pa turista Playa ta algo otro y e ta un mercadeo completamente otro, di cual nan tin di bay enfoca riba dje.
Segun Tieleman, el a sinta cu dos minister na mesa y awo e ta wardando riba nan contesta. Pero e cuater luna cu nan a duna, Tieleman no por wanta.
Actvidad di fin di aña
Diabierna den Caya Grandi ta bay tin ambiente. Na Chubato Beer World Aruba lo tin ambiente y aki ta bende cerbes di diferente pais, entrada ta gratis. Chubato Beer World Aruba ta situa unda antes tabata Nikky Habibe den Caya Grandi. Nan kier a cera e aña c’un fiesta pa publico y ta bay tin tocamento cu Groove Masters. Tambe nan tin mas di 200 tipo di cerbes pa brinda un y tur.
Diasabra tin tiramento di pagara pa 1:00 pm riba Plaza Nikki Habibe y Chubato Beer World Aruba.
