Aquannette Gunn, miembro di e fraccion di MAS den Parlamento di Aruba a dirigi varios pregunta n’e Prome Minister, relaciona cu temanan critico den e Departamento di Infrastructura y Planificacion (DIP), cual director Haime Croes, ta suspendi desde mei 2023 debi na un investigacion disciplinario, den man di Departamento di Recurso Humano (DRH). Durante su suspension, a nombra Marilynn Dirksen como director interino di DIP. Despues di un aña, ainda no a presenta un informe final riba e investigacion ni a tuma un decision riba e permanencia di e director.
Aquannette Gun di fraccion MAS ta puntra Prome Minister pa informa Parlamento si e resultado di e investigacion disciplinario di DRH a keda finalisa y entrega na su persona y kico ta e resultado. A tende tambe cu lo tin un caso den corte cu Haime Croes a entama. Ta puntra si ta Pais Aruba a entama un caso contra e director di DIP of si ta vice versa. Kier sa si ya tin un fecha stipula pa tratamento di e caso den corte y si e intencion ta pa nombra un otro persona den e funcion di director di DIP, esta cu lo habri un un vacatura (DRH) pa tur otro persona por solicita pa e funcion. MAS kier pa Minister Presidente Evelyn Wever-Croes comparti cu Parlamento kico lo ta e ‘functievereisten en competenties’ cu e solicitante mester tin pa asina ocupa e funcion di director di DIP.
Desde februari 2021, Marilynn Dirksen ta traha na DIP y despues di e suspension di e director, a pone na encargo temporal di e maneho di e departamento. Te awo, e Comision di Infrastructura solamente a ricibi un presentacion di e management team di DIP na augustus 2023. Basa riba esaki, Gunn ta puntra si por comparti cu Parlamento e constelacion (nomber, fam y funcion) di e management team di DIP.
Pero mas cu djis di ken ta na cabes, e fraccion kier ta sigur cu medidanan pa garantisa intergridad ta na su luga. Por ehempel, kier verifica cu si Marilynn Dirksen a pasa door di un ‘veiligheidsonderzoek’ (screening) siendo na cabes di e management team di DIP. Si e contesta ta afirmativo, MAS ta pidi pa Minister Presidente comparti e resultado di e VDA screening di Marilynn Dirksen cu Parlamento. Y si no ta asina, e ora MAS kier un splicacion di con por ta posibel cu e proceso aki no a tuma luga ainda considerando cu Marilynn Dirksen ta ocupando e funcion pa un aña caba. Y mesora si por contesta pa ki tempo lo efectua esaki considerando cu e funcion ta uno di confiansa (vertrouwensfunctie), den cual integridad mester ta intachabel!
Minister Presidente a indica na varios ocasion cu el a autorisa e director di DIP pa tuma decision riba tereno y otro asunto crucial na DIP. Pero Aquannette Gun (MAS) kier sa specificamente si e Management Team di DIP tin e apoderacion pa tuma decisionnan riba tereno y tur otro asuntonan crucial den DIP. Den esaki ta cuestiona cu si solamente un persona di e Management Team tin e poder pa firma na nomber di e Minister Presidente of e apoderacion ta den man di mas cu un persona di e management team. Pasobra si e apoderacion ta den man di mas cu un persona di e management team, e ora kier sa kende nan ta esnan encarga pa firma na nomber di Evelyn Wever-croes.
Finalmente Aquannette Gunn ta puntra pa Minister Presidente Evelyn Wever-Croes comparti cu Parlamento ki tipo y cuanto ‘akte’ di tereno residencial y comercial a pasa den aña 2021 te cu e prome kwartaal di aña 2024. Preferibel pa haya e tabel anual clasifica pa luna, es decir cuanto ‘akte’ a pasa cada luna di e aña.
Aquannette Gunn a finalisa indicando cu e ta spera di ricibi e contestanan por escrito di Prome Minister, conforme di locual ta stipula den e Reglamento di Orden, es decir, den un plaso di tres siman di tempo.
