Diahuebs, 1 di september 2022, Fundacion Pa Nos Muchanan a presenta e anochi informativo pa mayor titula: “Mayor ta pa semper, aunke no ta bou mesun dak”, na unda un total di 9 mayor a participa. Segun estudio, Aruba ta den e top 5 pais cu e porcentahe mas halto di divorcio. Divorcio y separacion por afecta e famia completo, incluyendo e yiunan den e famia.
Mirando e cantidad halto di separacion y divorcio na Aruba, e ta importante pa mayor ta na altura di e efectonan cu esaki tin riba nan yiunan y tambe con ta e miho manera pa guia nan yiu durante e proceso aki. Durante e anochi informativo tabatin como invitado special y orador terapista di famia y pareha Enid De Kort y ortopedagogo Shaska Kock. E meta di e anochi informativo tabata pa siña e mayornan tocante e aspecto di ta den un famia mixto. E mayornan a siña con esaki por afecta nan yiu y nan famia.
Ademas, con nan como mayor por guia nan yiu den e proceso di separacion. E mayornan a siña con pa papia cu nan yiu durante un temporada cu tin hopi cambio andando. Finalmente, e mayornan a siña con pa anda cu e diferente emocion di nan yiu cu por presenta durante tur e cambio. Mirando cu separacion, divorcio y e cambionan cu un mucha ta pasa aden ora di cuminsa biba den un famia mixto por tin efecto riba e mucha, nos como organisacion ta haya importante cu mayornan ta educa y informa riba con pa guia nan yiunan durante un situacion asina.
E anochi informativo pa mayor tabata exitoso, na unda esunnan presente tabatin e oportunidad pa haci pregunta na e oradornan, comparti nan experiencia y intercambia idea cu otro mayornan cu tambe a pasa den separacion y ta forma parti di un famia mixto.
