Un cu un ta dos. Otmar Oduber a duna declaracion caba cu Andin Bikker y su persona, lo bira minister. Eynan tambe ta cuminsa cu e discusion, kico a resta. A resta 5 asiento, si ta bay un Gobierno di 7. Evelyn Wever-Croes a splica cu e mes no a scucha e declaracionnan.
Loke cu sr. Otmar Oduber a expresa, lo ta su deseo. Wever-Croes, kende ta formador, no sa ainda ken ta bira minister. Bo ta bira minister, na momento cu e screening cuminsa te cu a caba y cu Gobernador a aprob’e. No ta algo cu e ta dicidi cu ta bira minister. Esey indudablemente e deseo cu ta biba cerca nan. Esey ta loke cu el a expresa, pero no ta asina leu. Wever-Croes ta formador awor aki y hopi hende ta bisa cu e lo bira prome minister, pero esey ta depende.
Formador ta duna informacion
Wever-Croes ta e canal oficial di informacion y screening. E tin cu bay via formador. Na e momento aki, e cantidad di minister ta keda na 7. Pues no a benta awa den biña, ainda!
Ady Thijsen a retira?
Ohala cu logra caba cu e formacion. Indudablemente Ady Thijsen lo tin un papel nobo den e gobierno aki. Sea na Hulanda, na Aruba, na Merca, na diferente parti di mundo, no por bisa ainda. No ta asina leu. Pero indudablemente si, pero pa su experiencia y conocemento, e lo hunga un papel importante.
Proceso di screening di un minister
E proceso di screening, segun formador, ora cu un partido ta propone candidatonan pa bira minister, e ta propone nomber. E propone por ehempel partido RED, cu ta aspira un minister. E por dicidi cu e ta pone dos nomber, tres nomber, mientras cu ta bezig ta wak con e screening ta bin. E partido tin cu duna nomber, como formador. Ora cu haya e nombernan, ta traha un carta pa pidi Procurador General pa haci un screening riba e informacionnan cu por tin, antecedentenan penal riba e candidato. Tin cu manda un carta pa Departamento di Impuesto, caminda cu nan ta bay mira si e candidato, con su comportacion pa loke ta impuesto ta y tin cu manda un carta pa Siguridad Nacional, cu ta bay haci un investigacion riba siguridad nacional. Una bes cu haya e contestanan bek di e tres departamentonan aki y cada un tin mester di nan tempo pa haci’e, e ora tin cu bay tene un combersacion den cuadro di e screening, e procedura cu tin un landsbesluit p’e, cu cada candidato, a base di locual a bin dilanti, den e diferente informenan. E candidatonan mester yena algun formulario tambe cu ta poni den e landsbesluit y hunto cu eseynan, e ora ta yega na un conclusion, cu no tin nada cu ta stroba pa e candidato aki por wordo proponi como candidato.
Na e momento eynan, no a bin nada malo di ningun di e rapportnan, Wever-Croes ta esun cu ta bisa cu e ta minister. Gobernador finalmente tin cu haci’e. Ora cu caba cu cada combersacion cu tur e bevindingen den e rapportnan, tin cu entrega nan na Gobernador, e ora Gobernador tin su propio autoridad pa bay duna interpretacion na locual cu Wever-Croes ta presente, e ora Gobernador tin e palabra final den esaki. Ta un procedura serio, ta un procedura cu no por bisa 1-2-3. Si tin 3 plus, bo ta cla. Ainda tin un otro procedura su tras.
Con largo
E speransa ta cu e no lo dura hopi largo. Tin cu cada un di e instancianan, nan espacio pa nan haci na investigacion y una bes cu e bin bek cerca Formador, e lo haci’e diligentemente y Gobernador tambe. Loke no por haci, ta pone presion riba Siguridad Nacional of PG of Belasting pa haci’e. Awe, tin un parlamento nobo. Awe merdia lo bay scoge e presidente di Parlamento nobo y e ora bo tin e prome paso den bo sistema democratico cu ta cubri, cu bo tin un Parlamento. Despues tin cu sigui traha pa un Gobierno nobo y no kier ansha. Ta spera cu e no dura hopi largo, pasobra henter Aruba ta desea esey, pero soppi pura ta sali salo. Y tin cu prepara e sopi aki hopi bon.
