Entrante 1 di juli Fundacion Pa Nos Comunidad (FPNC) a tuma e proyecto di ayudo pa cuminda pa famianan cu ta den necesidad.
Gianaika van der Biezen, director di e fundacion, a comenta cu nan a reuni cu Cruz Cora pa asina planifica esaki den un manera eficiente. Importante den e proceso aki tabata pa evita cu ta comparti informacion personal di e famianan. Pues asina a haci e proceso aki via un code cu tur cliente di Cruz Cora a haya riba nan telefon pa asina nan por aplica y registra pa ricibi pakete di cuminda.
Fuera di esaki nan a traha tres video den tres diferente idioma, Papiamento, Spaño y Ingles. Aki nan ta detaya e proceso di aplicacion pa cu e paketenan di cuminda. Registracion a tuma luga entre 7 pa 13 di juni pa ricibi esaki. A bolbe a habri un otro siman pa registra debi na cu demanda tabata hopi halto y tin famianan cu no a logra registra pa esaki den e corto tempo.
Recientemente Cruz Cora a informa FPNC cu entrante dia 18 nan no lo tin acceso na e carchinan mas. Esaki a pone cu nan mester a cambia e planning, a pidi tur persona cu a registra pa acudi na FPNC cu nan carchi pa nan scan esaki y mira berdad cu esaki ta pertenece na e persona cu a registra.
Ta di nota si cu tin hende cu no a bin busca nan carchi, pues tin hende a pasa door di e proceso di screening y no a presenta. FPNC a haci un peticion na e hendenan cu a aplica y cu no a wordo yama ainda pa tene pasenshi ya cu esaki lo tuma luga den e proximo dianan. A pidi tambe pa agrega tur documento (actualisa) cu ta wordo pidi pa asina evita cu e proceso di screening tarda un poco mas.
Pa e personanan cu a perde trabou, cu a haya Fase, ta pidi nan pa trece un comprobante di esaki. Tambe a fundacion lo bay cuminsa cu bishita na cas (huisbezoek) pa evalua si di berdad e esun cu a aplica ta den necesidad y ta rekeri ayudo cu voedselpakket. A haci e cambio di voucher pa voedselpakket mirando cu den pasado hende tabata haci mal uzo di e voucher y asina a opta pa cambia esaki pa un caha di cuminda pa asina garantisa cu no ta haci mal uzo di e vouchernan mas.
A base di esaki, e persona cu a registra lo mester bin personalmente pa busca e pakete aki. Si mester comunica cu FPNC, por yama nan libremente na 5880002 of por bishita nan localidad nobo na Sero Blanco 14-A of na Kibrahacha di 8:00 am pa 5:00 pm.