Diabierna a tuma basta ora pa corte trata e caso penal contra e homber Gabriel Prato Ovalles, acusa di a abusa sexualmente di un turista cu el a duna masashi.
Esaki a tuma luga aña pasa den luna di december na un hotel, unda cu el a haci uzo di e servicio di masashi pa relaha su mes.
E homber ta bisa cu tabatin algo sexual a tuma luga, pero el a bisa cu el a sosode cu consentimento di e cliente, kende a bini vakantie cu su casa.
Durante tratamento a bini dilanti cu el a sunchi e muhe, a mishi cu ne den forma intima y a hasta a uza su dedenan pa penetra e cliente. Despues el a kita su paña y a subi riba dje. Na ultimo, el a dicidi di no haci nada mas despues cu el a constata cu falta solamente cinco minuut pa e sesion finalisa.
Su abogado a trece dilanti cu camaranan di e hotel ta mustra e señora demasiado trankil despues di e tratamento di masashi. Tambe ora cu ta papia cu Polis, e tabata mustra trankil y, segun e abogado, e casa tabata mustra mas agita.
E homber a declara cu ora cu su esposa a bolbe camber, el a bis’e cu e no ta sinti bon y a bay di biaha den baño. Ora cu el a caba, el a bisa “mi kier papia cu bo” y a cont’e kico a pasa. Mesora a bati alarma na polis.
Pa Ministerio Publico, e delito ta proba. Y condena cu e homber aki a abusa di su trabou y di e situacion di un cliente (turista).. Dañando nomber di e isla cu ta depende di turismo.
Teniendo cuenta cu casonan similar, el a pidi corte pa declar’e culpabel y pone un castigo di 4 aña, y tambe cu durante 4 aña e no por eherce su profesion di masahista.
E denunciante y su casa tabata presente den sala. E señora a bisa cu el a biaha dos mil miya pa informa hues cu e no tabata kier nada otro cu un masashi y no a consenti pa algo otro.
Hues a bisa aki tres siman e ta duna su sentencia.
