Diabierna mainta Corte a trata un caso penal contra ex-parlamentario Lainda Westerhoff, su yiu Dwayne Kemp y su ex-pareha (ex-convicto) Niurick Hereira, kendenan tabatin mas cu un acusacion contra nan. Pa tanto Westerhof como su yiu a exigi castigo cu ta nifica cu nan no mester bay cera bek. E exigencia contra Hereira si tabata diferente pa motibo cu e ta un conoci di husticia caba. Aki tres siman Hues lo dicta sentencia.
Acusacion contra Hereira y Westerhof ta cu hunto cu otronan, posesion di cocaina y marihuana riba 20 di december 2023. Tambe ta acusa nan di benta y posesion di cocaina den e periodo di prome di augustus 2023 te 20 di december 2023.
Banda di esaki ta acusa Hereira tambe di hunto cu otronan, esta cu Dwayne Kemp, di a causa lesion fisico grave, riba 26 di november 2023, na un persona ora cu nan a dal’e y scop’e intencionalmente cu forsa varios biaha na su cabes y cara.
Tambe ta acusa e dos hombernan aki di ladronicia di propiedadnan di e persona aki riba e fecha en cuestion.
Pa loke ta e droga haya den frishider na cas di Lainda, y e cocaina scondi den un lachi na e piso abou den un cashi, Herreira ta bisa cu esaki ta pa propio uzo. El a admiti si tin biaha cu e ta haci fabor na conoci di dje cu no tin forma pa sali cumpra droga.
Lainda ta bisa cu e no tin nada di haber cu droga. E cas unda e ta biba tin dos piso. E piso abou, unda tin e frishider y e sala, ta un parti unda casi e no sa yega. E frishider e no mester habri mes pasobra, e ta coy awa sin habrie. E no ta gusta cushina y ta cumpra cuminda riba caya.
E mes ta duna les, despues ta core pasa su cas cambia paña of ta cambia na e negoshi di construccion cu e tabatin. Anochi ora cu e caba eynan, e ta bay gym maximalmente dos ora, tur dia. Pues practicamente no ta na cas y e no tabata sa di e droga. Tampoco e tabata sa cu e homber ta deal den droga. Aunke na ultimo el a mir’e ta haci cosnan straño, manera disparce pa algun ora den marduga. “Mi a pensa cu ta cerca su ex e tabata bay.”
Un relacion cu a cuminsa bon, hopi lihe a bay atras.
El a conoce e acusado via di Instagram, momento cu e tabata den KIA ainda, unda cu el a bishit’e algun biaha. “Mi a kere cu el a cambia, pero a resulta cu no ta asina.” Su abogado a bisa hues, manera por mira tin biaha amor ta ciego.
“Mi no ta uza droga y mi ta docente. Nan por test nos cualkier momento,” el a bisa.
Pa loke ta e maltrato, e dos hombernan a topa cu e auto staciona mita riba caminda y kier a bay yuda e homber of dun’e un lift. Pero e homber a bira agresivo y nan a cuminsa sut’e cu mokete y scop. Casi trinta mokete y scop combina. Pero horta si, nan ta nenga di a hort’e. Aunke tin combersacion di “compra di droga” via un samsung y cu e number di e acusado Hereira. Pero e aparato di celular nunca a logra hay’e.
Na final fiscal a haya tur culpabel di un of mas di e acusacionnan.
Pa Lainda a pidi pa declar’e culpabel di posesion di marihuana so y pa esaki a pidi un castigo di 180 dia di cual 104 dia ta condicional, kitando e 76 dianan cu el a pasa cera y dos aña di prueba. Pa su yiu Dwayne di 17 aña a pidi 60 dia di cual 40 ta condicional, kitando e 20 dia cu a pasa deteni y 2 aña di prueba. Banda di esaki e mester bay bou guia di Reclassering y a pidi pa duna 120 ora di trabou pa comunidad of 60 dia cera.
Den caso di Hereira, a pidi 42 luna di cual seis luna ta condicional, y 3 aña di prueba. Na momento cu Hereira a comete e delitonan di cual ta acus’e di dje, el a caba di sali liber temporalmente despues di sinta tres di e seis añanan di castigo cu Corte a impone na aña 2020.
Aki tres siman tin sentencia.
