Siman pasa tabata poni riba rol un caso grandi di malversacion cu a tuma luga na Departamento di Impuesto (DIMP). E acusado den e caso aki ta Filomena Maduro, kende tabata traha como cahera na DIMP. Ta acus’e cu durante e periodo di aña 2016 pa aña 2020 el a malversa un suma di casi 900 mil florin.
Mas cu 1 miyon?
Ni e acusado ni su abogado tabata presente den corte diahuebs ultimo. Segun por a compronde, e abogado mr. Desiree Croes a pidi pospone tratamento di e caso, pasobra e tabata malo y debi na e echo cu e tin algun cos cu e ta desea pa investiga mas riba dje.
Corte a dicidi e ora cu ta miho pa pospone esaki sin un fecha fiho y momento cu ta mas avansa, lo pone un fecha pa e tratamento profundo. Na mes momento tin ontnemingszaak tambe contra e ex-empleado aki di DIMP. Extraoficialmente por a comprende cu e suma den e caso aki ta surpasa un miyon florin.
Detencion riba sospecho di malversacion di Lena Maduro
Dia 25 di februari di aña 2022, Landsrecherche a detene e sospechoso den un investigacion penal di posibel malversacion na Departamento di Impuesto (DIMP). Ta sospecha cu Filomena Maduro, miho conoci como Lena, lo a malversa placa di belasting den e periodo entre aña 2016 y aña 2020. A malversa un suma asina grandi di placa, cu ta sospecha cu mester tin mas colega, posiblemente hefe, envolvi den e hortamento aki. Pues aunke tabatin algun colega cu tambe a bay cas cu suspension, no por a descarta cu algun detencion mas lo a cay.
Landsrecherche a dura dos aña prome cu por a cuminsa e caso aki y detene e sospechoso principal den e posibel caso di malversacion. Ademas di malversacion, ta sospecha Lena Maduro tambe di labamento di placa. Den esey Ministerio Publico, por medio di Landsrecherche lo mester yega na e berdad kico el a haci cu tur e cen cash cu el a horta di su trabou.
Unda el a gast’e no ta conoci, pasobra como cu ta placa efectivo, dificilmente e por deposit’e na banco. Pasobra e ora ta facil pa gar’e. Pues, ora cu ta placa horta asina, mayoria bes ta cumpra articulo caro cu ne of ta biba den casino pa mira si ey por ‘laba e placa’ pa ora deposita nan bisa banco cu nan a gana casino anochi. Tur esey tabata parti di e investigacion.
A lag’e bay den libertad condicional
Dia 4 di maart di aña 2022 fiscal di Ministerio Publico a ordena libertad condicional di e sospechoso principal den malversacion di plac’i belasting. Husticia ta sospecha cu un empleada of kisas yuda door di otro colega tambe, a horta un suma substancial for di caha di gobierno. E ta sigui como un sospechoso pero no ta necesario pa want’e cera mas.
