E ta un temporada hopi spera cu ta carga cu emocion, felicidad y tristesa. Tristesa p’esunnan cu no a logra y alegria p’esunnan cu a slaag.
Diaranson atardi Filomena College Mavo di San Nicolas a tene su ceremonia di resultado pa tur candidato di examen. Despues cu a traha examen na luna di mei, awe e resultado a bira conoci. Raquel Lampe ta directora di Filomena College, durante un entrevista a conta cu tabata un momento special caminda a comparti cu famia, colega y tur cu a bin celebra cu e studiantenan.
E aña aki tabatin tres klas di examen pa cual entre nan 77% a slaag den e prome ronda, pero tin un cantidad di nuebe studiante cu ainda por slaag den e di dos ronda. Den e prome ronda a conta cu un cantidad di 56 studiante cu a logra.
Durante e ceremonia, tabatin un momento special, caminda a dedic’e n’e alumno Judson Vrolijk. Vrolijk ta interna den Prinses Maxima Centrum na Utrecht bringando cu su malesa pero via distancia toch a logra p’e por a haci su examennan.
Esaki ta danki n’e instancianan gubernamental di enseñansa na Aruba. Judson a logra slaag tambe den e prome ronda, pa cual e directora ta contento cu ne. E tin hopi gana di sigui studia pero tambe hopi gana pa cu bida mes. “Pabien Judson, bo ta amazing”, asina Lampe a indica.
