E asociacion di futbol FIFA a inicia procedemento disciplinario contra e federacionnan di futbol di Argentina y Hulanda. Esaki a pasa un dia despues dje encuentro den kwart final di Copa Mundial Qatar 2022 entre e seleccionnan aki.
E Argentinonan ta acusa di a viola articulo 12, cu ta trata riba e faltanan dje hungado- y coachnan. Tambe ta investiga si nan a viola articulo 16, relativo di orden y siguridad den e competencianan.
Pa loke ta trata Hulanda, solamente a referi n’e posibel conducta malo di e hungado- y/of coachnan. Sinembargo, semper ta inicia un investigacion si un team haya cinco of mas carchi geel den un wega, manera tabata den caso di ambos seleccion.
Diabierna anochi e tension tabata halto. Referee Antonio Mateu Lahoz finalmente a saca number record di carchi, un total di ocho carchi geel pa Argentina, seis carchi geel y un carchi cora pa Hulanda.
