Dia 15 di october ta dia internacional dje garoti blanco strepi cora. Den cuadro di esaki, FAVI a tene un siman di conscientisacion y celebracion y awe a celebra e antesala pa e celebracion di mañan. Sary Wernet-Kelly, terapista di revalidacion di FAVI a splica cu diamars nan a tene un caminata di training di mobilidad caminda cu e clientenan a haya chens di practica cu nan garoti na un manera apropia. Wernet-Kelly a splica cu no ta solamente crusamento di caya ta e enfoke riba dia di garoti pero tambe e mobilidad in general pa e persona cu limitacion visual por sinti su mes sigur den su bida diario.
Asina tambe awe mainta FAVI a tene un sesion di pregunta y contesta cu dos cliente, un di un edad hoben y e otro di edad un poco mas halto pa asina combersa tocante nan bida diario y kico nan a haci pa logra ta mas independiente, esta e enfoke di mas importante FAVI.
Wernet-Kelly a splica tambe cu e problemanan di mas comun cu ta causa perdida di bista ta diabetes y presion di wowo. E ultimo aki ta aparece sin presenta sintoma y unabes cuminsa perde bista hopi hende no ta acudi na dokter di biaha. FAVI ta enfatisa pa no warda si esaki mester sosode, bay confronta e problema di biaha.
Pa cobertura mas amplio lesa edicion di TREMPAN mañan.
