Diaranson tabata un dia tristo y alabes di alegria. Tristo pasobra mester a tuma despedida di e conocido periodista y locutor Angel Coronel, kende a fayece despues di un lucha largo cu e malesa di cancer.
Angel ta laga atras su esposa Karen, tres yiu muhe y cinco nieta.
Angel Coronel a dedica su bida pa eleva e nivel di noticia y entretenimento den radio, influenciando hopi hende cu su pasion y compromiso pa calidad y berdad.
Su labor den prensa no tabata solamente pa transmiti noticia, sino tambe pa inspira y motiva otro pa sigui su shelo den e mundo aki. Su vision a cambia e paisahe di radiodifusion y lo keda pa semper como un ehemplo di integridad y dedicacion.
Y esaki ta loke cu a bini dilanti den e diferente discurso hiba e atardi aki. A papia di su hubentud, unda el a studia dos profesion na John F. Kennedy School pero nunca a practica nan pasobra ta radiodifusion tabata su pasion. El a haya e chens cerca Carlos Kelkboom di Radio Kelkboom. Y despues a pasa pa radionan Canal 90 y Radio Carina.
Durante e diferente discursonan hiba a mustra semper riba e lealtad di Angel pa cualkier causa cu e ta kere den dje, sea familiar of politico. Un persona semper alegre y dedica na su trabou, di e mesun forma cu e ta dedica na su famia, organisando diferente actividad pa trece famia hunto.
Tambe a mustra riba e promocion cu el a haci pa turismo di Aruba. Pa Aruba e tabata tin hopi preocupacion y conseho / sugerencia di loke por ta miho. Incluso hasta riba cama malo el a dicidi di cuminsa un show riba Facebook unda e tabata trece su pensamentonan dilanti.
Famia y amigonan tabata record’e di un forma alegre, pa su compasacion y dedicacion. Tur esaki por a scucha den palabranan di su ex-coleganan Juancito Giel y Toko Winklaar; di su amigonan di Socotoro Boys, e bario unda el a biba gran parti di su bida, pero tambe den palabra di su yiu muhe Monique y su subrina Antonieta Ras-Booi.
ENTIERO
E acto di entiero di Angel a tuma luga na Aurora Funeral Home. Pa 3:30pm, tabatin un response na encargo di Pastoor Eminzul (Mincho) Bejarano. Despues a tuma luga e acto di cremacion den seno familiar.
Te despues amigo Angel Coronel.
