Recientemente a sali den publicacion un noticia cu a conmove henter e pueblo di Aruba, caminda un hoben di apenas 21 aña a fayece den cas na Sabana Basora.
Famia ta hopi tristo pa cu e situacion mirando cu no a sper’e. Ta apenas un dia prome cu el a bay sosega, ainda el a bay traha. Locual ta haci e situacion mas doloroso ta cu, el a bay laga dos yiu chikito y su pareha atras.
Zulaima Werleman ta suegra di Ashanti, durante un encuentro cu representante di Headlines Group el a conta cu e ta recuri na 24ora.com mirando cu e tin mester sosten di e pueblo. E ta pidi pueblo pa pone man na curason. Ashanti su yiunan ta chikito, un tin 1 aña di edad y e otro tin apenas cuater luna.
Locual famia tin mester ta sosten financiero. Pa dera Ashanti, ta costa famia un suma di alrededor di 8 mil florin. Entre famia- y amigonan a logra cera e mitar di e suma pero ainda falta. Ashanti a caba di cumpli 21 aña. E no ta facil, e situacion financiero ta precario.
El a laga dos yiu atras y awo cu e peso aki, ta hacie casi imposibel pa cera henter e suma riba nan mes. Manera ta conoci, placa na Aruba no ta yega mas, Werleman a vocifera. E situacion ta otro si bo ta prepara p’un golpi of un sorpresa, pero esaki no tabata e caso.
Famia ta pidi comunidad pa tene man na curason y yuda. Por yama na 5661489 of por haci donacion na: 2312590190 – Aruba Bank – Zuilaika Thiel-Werleman.
E no ta facil pa e suegra yega den publicacion y pidi pa ayudo. No ta algo cu e ta haci. Pero mirando e situacion, cu a laga dos yiu a tras y su propio yiu, no ta ked’e nada otro pa pidi sosten p’asina por hiba Ashanti Morales na su ultimo luga di sosiego.
Ta premira cu pa otro siman por hiba Ashanti na su luga di sosiego. Ashanti a biba cinco aña cu Zulaima y e ta mir’e como su propio yiu.
