Rosi Kock ta un yiu preocupa y esaki tin di haber cu e situacion di su mama cu a fayece tres siman pasa. E famia ta preocupa cu nan mama a fayece di un forma inespera y esey ta e motibo cu nan a laga haci un autopsia. Dokter Jansen t’esun cu a haci autopsia cu mama di Rosi Kock.
Kock no ta satisfecho cu e supuesto resultado di e autopsia. Nan ta kere firmemente cu nan tin derecho di haya e berdadero resultado, mirando cu nan a paga p’e. Segun Kock, e dokter a bis’e cu e resultado ta privacidad di su mama. Kock a keda masha straña na e forma con e dokter a trata nan. Pa prome su mama a fayece tres siman pasa, y nan t’esun cu a paga pa haci e autopsia. Mas a leu Kock a conta cu, nan a papia cu un abogado y a bisa nan cu e dokter tin deber di duna nan e resultado basa riba dos punto.
E prome punto, ta pasobra nan ta yiu, y e di dos pasobra nan tin e recibo valido cu a paga pa hacie. Famia no ta compronde dicon e dokter tin miedo di duna nan e resultado. Kock a menciona cu dokter Jansen a receta su mama varios remedi, cu segun e, no ta bay cu otro. Famia ta kere cu e dokter a faya cu nan mama. E mesun dokter cu a haci autopsia, tabata dokter di cas di nan mama. Polis a presenta na e oficina di e dokter mirando cu e dokter a pidi famia pa sali for di su edificio. E dokter a laga sa tambe cu polis ni 24ora.com ta bonbini na su oficina. Polis a splica e famia e pasonan cu nan tin cu cana.
