Un investigacion profundo ta andando relaciona cu un atraco cu a tuma luga na un cas na Seroe Blanco diamars den oranan di anochi.
E atraco aki a tuma luga na un compleho di apartamento den oranan di anochi. Algun atracadornan arma a drenta un apartamento y a mara e habitantenan. Despues a cuminsa listra den e apartamento pa placa y a bay cu tur loke nan a haya, y loke ta di balor.
Algun rato despues cu e atracadonan a bandona e sitio, e habitantenan a logra los. Sinembargo no a bati alarma sino te den oranan di mainta. Tanto patruya como Recherche a acudi na e sitio alrededor di 11’or di mainta.
Ta un famia so ta biba den e apartamento y mucho detaye no ta conoci. Pero polisnan a cuminsa busca tur sorto evidencia, a controla camaranan den bisindario of materialnan cu e atracadonan por a laga atras.
Te ainda no tin informe di tur kico e ladronnan aki a bay cun’e, ni con nan a yega y bay for di e sitio. E ta bay tuma autoridadnan un poco tempo mirando cu a tarda pa haci e denuncia.
