E aña aki un biaha mas Comision Promove Cultura ta den preparacion pa un otro Festival Un Canto na Aruba su Himno y Bandera.
Aña 2023 ta un aña grandi pa e festival mirando cu e aña aki tabata e di 20 edicion di e festival aki. Asina Aaron Arenas,Organisador Festival Un Festival Un Canto na Aruba su Himno y Bandera, a cuminsa na bisa. E comision no a laga e temporada di Carnaval stroba nan di traha, ya cu ta for di ora cu Festival di Dande a termina, nan a cuminsa prepara pa esaki.
Dos siman pasa, inscripcion p’e festival aki a habri y e lo cera diadomingo, dia 26 di februari pa 11:59pm. Pa loke ta trekmento di lot, esaki ta tuma luga dia 28 di februari pa 6:00pm y asina e secuencia oficial di e festival lo wordo publica dia prome di maart. Y asina tambe, Arenas a bisa, ta habri e luna cultural, e luna di nos himno y bandera.
Mas aleu, Arenas a bisa cu ya caba, sin cu ainda e inscripcionnan a cera, ya caba tin 30 mucha/hoben y diesdos agrupacion musical. Ta spera di por yega 45 cantante, door di acerca e hoben- y e scolnan, pa asina por haci e festival aki, mucho mas grandi.
E festival lo tuma luga dia 10 y 11 di maart 2023 y e luga lo wordo anuncia despues. Normalmente esaki ta tuma luga riba Plaza Betico, pero door di varios keho di bisiña lo no haya vergunning pa cual lo mester cuminsa pensa riba un otro localidad.
