Durante un entrevista exclusivo cu Presidente di Parlamento, mr. Edgard Vrolijk a puntr’e riba staff y personal di e organisacion. Vrolijk a conta cu trabou tin, trahado mester. Tin espacio pa trintitres hende traha na parlamento, pa cual actualmente tin solamente diescuater persona. Despues di basta esfuerso, a ricibi aprobacion pa busca mas hende pa traha na parlamento. A cuminsa cu e proceso di ‘interne vacature’, pues den gobierno mes, pero no a logra. No ta keda nada otro di bay extern cu ne. Pa awo, tin cinco persona cu ta den tapara pa ricibi trabou na parlamento, ta bezig den e proceso di entrevista y seleccion. Ta spera cu pronto termina cu e proceso y pa djey na februari sigui cu cinco persona mas. Ya asina por cuminsa yega cerca di e trinta.
E ta necesario pa parlamento conoce expansion sino den trahadonan cu ta na final di dia ta yuda e parlamentarionan p’asina haci nan trabou miho posibel p’e pueblo. Bo no por “overload” e trahadonan cu hopi trabou. Actualmente e trabou ta hopi pero asina mes e trahadonan cu hopi amor ta cumpli pa parlamento por sigui ta operacional. Sin nan esfuerso, esaki no ta posibel. Vrolijk ta promove hobennan profesional pa aplica, sea di EPI of Univesidad p’asina contribui pa sirbi nan pais bek.
E ta importante pa tin mente fresco den un organisacion manera parlamento. Un di e vacaturanan cu sigur tin disponibel ta pa maneha e comunicacion di parlamento, pa trece e informacion oficial cerc’e pueblo pero tambe pa tin miho cooperacion cu prensa local.
Vrolijk na final a termina deseando e pueblo feliz dianan di fiesta y ta desea pa e cambio di aña trece hopi prosperidad y positivismo pa tur hende. “Bon Pasco y bon aña”, asina Presidente di Parlamento a termina bisando.
Tocante Edgard Vrolijk
Na 2000 el a termina su estudio na nivel HBO como maestro di scol specialisa pa educacion di 6 pa 12 aña. Na 2012 el a logra e titulo di Bachelor in Law y e aña ki el a obtene esun di Meester in Rechten.
El a drenta arena politico na 2013 obteniendo 586 voto na su nomber. Na 2017, el a aumenta pa yega na 749 voto. Den ultimo eleccion el a obtene 619 voto.
