Dialuna, pa mas of menos 10:45 am, a drenta informacion di un accidente cu herido. Esaki a tuma luga na Camacuri, riba e T-weg na altura di e edificio di Departamento di Impuesto
Aparentemente un v-car Suzuki Baleno, lo a bin fo’i dje T-weg y a subi caminda di Camacuri, sin duna preferencia na un Honda Fit, biniendo fo’i pariba.
Segun cu tin di compronde, e chauffeur di e v-car tabata haciendo uzo di Google Maps pa por mobilisa y no a paga tino na momento cu el a subi caminda grandi.
Segun chauffeur di e Honda Fit, e v-car a subi di golpi, cu e consecuencia cu el a dal riba su auto y a pone cu el a caba na otro banda di caminda.
Dos ambulance a presenta pa asina duna asistencia na e ocupante di e Honda Fit como tambe na e dos ocupantenan di e v-car. Di e tres heridonan, dos di nan, e pareha di e v-car a bay hospital cu ambulance pa haya atencion medico avansa.
Polis a cera e caminda na altura di rotonde Las Americas, pa asina nan por haci nan trabao mas trankil.
Daño causa ta considerabel. Takelwagen a bin pa asina hala e v-car fo’i caminda.
