E unico informacion concreto cu tin na e momentonan aki di e explosion den refineria ta cu tres persona a resultado herida. E echo a sosode un poco despues di 10:00 di mainta ora cu na diferente parti di Aruba a scucha un zonido masha duro mes. Despues di un rato a haya confirmacion cu tabata trata di un explosion.
Polis, ambulance, Brandweer, director di Crisis Management Office y Departamento di Calidad, director adhunto di FMSA (Fuel & Marketing & Supply Aruba) y otro autoridadnan tabata presente pa mira con pa atende cu e situacion.
Mirando cu ta papia di un explosion, cu ta cay bou calamidad, a pone e caso den man di Rino Hermans y su departamento, kende tambe a yega na e sitio prome cu merdia.
E zonido di explosion tabata asina duro cu por bisa cu mas cu mita di Aruba a sinti y scucha esaki. Hopi hende a kere inicialmente cu tabata trata di un temblor. A papia cu casnan den cercania di e refineria a haya scheur, pero no a logra haya confirmacion di esaki.
Loke por bisa ta cu Polis, FMSA y Oficina di Maneho di Crisis (Hermans) a confirma cu tin tres persona herida y transporta den ambulance pa hospital, unda henter un team medico tabata en espera di nan. Mirando gravedad di e situacion, a pone cuater brommer policial pa escolta e ambulancenan te na HOH. Esaki a haci cu hopi lihe e vehiculonan a yega cu e heridonan.
Informacion extra-oficial ta indica cu di e tres heridonan, uno ta critico. E di dos ta cu situacion ta serio pero no grave y e di tres ta leve. Pero niun di tres ta den peligro di perde nan bida.
A combersa brevemente cu Rino Hermans, kende tabata riba caminda pa otro reunion ora cu e echo a tuma luga. El a splica cu e explosion a sosode a causa di mescla di kimiconan durante un transporte. Un transporte cu tabata wordo haci pa e compania cu a tuma e empresa Mourik over, esta ARSPA.
Cual ta e kimiconan, no por a menciona ainda. Pa motibo cu e kimiconan a mescla y e explosion, esaki a bay liber den aire. Tabata suficiente motibo pa envolvi e Departamento di Calamidad. Esaki tabata motibo tambe pa haci un evaluacion si e kimico a plama den aire y si esaki ta afecta e situacion y areanan residencial den cercania.
E prome evaluacion di e Departamento di Calamidad a indica mesora cu no tin peligro y cu no tabata necesario pa evacua e casnan den cercania. Y tampoco peligro pa ripiticion. A informa e persona y instancianan concerni, cu despues di dos ora bida por sigui normal.
Awo ta cuminsa e parti investigativo cu ta den man di autoridadnan concerni.
