Pitch Time ta un proyecto organisa pa Cede Aruba y ta consisti di diferente seccion di hoben pa hoben. Cindy Jansen ta lider di ‘Every Mind Matters’ y ta consisti di mucha muhe hoben di 15 pa 24 aña.
Jansen ta conta cu lo crea un grupo di sosten cu ayudo profesional. Ta consisti di entre otro di psicologo, trahado social, un grupo trahado di Respaldo cu lo ta envolvi den e sesionnan.
Jansen a conta cu lo enfoca pa yuda e hobennan. Mirando cu e lista di Respaldo ta largo pa warda, asina ta cu por sinta cu e hobennan aki por acerca, unda cu tin psicologo cu lo papia cu nan.
No solamente lo papia cu e hobennan, pero lo tin mas actividad. Nan lo haci diferente cos, caminda cu na lo no keda cera den un luga y lo cansa.
Esaki lo ta un proyecto piloto cu lo ta di 3 pa 4 luna. Manera cu caba cu e proyecto aki lo evalua pa mira si lo sigui cu ne den futuro.
Jansen ta conta cu Cede Aruba tabatin mester di un hende encarga cu e proyecto. Di e manera aki a acerc’e mirando cu salud mental ta algo hopi importante. Mirando cu e mes t’un hoben y cu a caba EPI y a stage diferente caminda. El a ripara cu tin mester di ayudo, en particular nos hobennan.
Manera cu Jansen a caba cu su estudio, a tuma rienda. El a acerca su grupo cu ta studiando den e rumbo aki y a bay p’e reto. Cu mas di mil amor a tuma e proyecto aki, pasobra nos hobennan tin mester di dje.
El a agrega cu e hobennan ta busca ayudo den diferente manera cu hende no ta ripara esey. Ora cu ripara e ora e por ta laat.
Awe, diasabra nan tabatin tambe nan dia informativo, unda cu el a haya hopi yamada di varios hoben. Miedo cu nan tin, ta un taboo awor aki. Ta algo cu como grupo nan kier kibra pa no tin miedo. Trahado social y psicologo t’ey pa yuda. Pero si no cana e caminda pa yega cerca nan, nan no ta bay yega zomaar cerca e grupo.
Awo tin cu busca e hobennan aki pa por haya nan. Jansen ta contento di e tantisimo mensahenan cu el a haya, pasobra e sa cu e hobennan aki mester di yudansa.
Jansen tin un mensahe y esey ta pa no tin miedo. “Yama. Nos ta un grupo di hoben pa hoben cu mi ta sinti cu nan tin mas e confiansa di acerca nos como hoben cu bay cerca un hende mas grandi. Bin cerca nos. Nos tur t’ey cla pa yuda. Nos no ta bay pone ningun hende un banda. Asina ta, hobennan cu ta lesa esaki, no tene miedo, pasobra nos t’ey pa yuda. Nos tin psicologo cu ta para nos tras pa yuda y tambe Respaldo cu ta cla nos tras pa yuda. No tene miedo, pasobra nos t’ey pa yuda nan.”
