Diabierna anochi a inicia e torneo di “kickball”di Perla Gymnastics hunto cu Kiwanis Club of Young Professionals. E meta di e torneo aki ta pa genera fondo p’asina Perla Gymnastics por renoba nan vloer y pone un completamente nobo.
E evento a inicia diabierna y ta sigui riba diasabra y culmina riba diadomingo. Miguel Arrobola ta presidente di Perla Gymnastics, durante e inicio di e evento el a conta cu e ta sumamente contento cu e dia a yega p’asina e weganan por tuma luga. E meta final ta locual ta importante.
Organisa un evento grandi no ta facil pero debi na bon comunicacion y cooperacion entre Kiwanis y Perla por mira bek riba un bon inicio di evento. Gran parti di e trabou a cay den man di Kiwanis pero boluntario- y mayornan di Perla tambe tabata presente p’asina reenforsa e operacion di e evento.
E companianan cu lo bataya contra otro ta: Setar, Elmar, KPA, Brandweer, Delloite, Aruba Airport Authority, WEB, Balashi, Te Paden y Red Machine. Por spera bon banda musical durante e fin di siman. Si tin persona cu kier yuda por tuma contacto cu Kiwanis p’asina por contribui cu fondo pa yuda esunnan cu mas mester di dje.
Perla Gymnastic ta cuminsa cu mucha for di dos aña caba, sigui pa cuater aña y ta bay te cu hende grandi. Tin categoria no solamente di mucha muhe sino mucha homber homber tambe.
Arrobola ta invita e pueblo pa pasa na Flatstone Ballpark y contribui cu e recaudamento di fondo y pasa un rato agradebel den seno familiar y disfruta di un tremendo wega di “kickball”
