Diaranson durante un rueda di prensa Prome Minister, mr. Evelyn Wever-Croes, a informa cu e uzo di scanner durante e proceso di votacion ya no ta bay door. El a nenga cu presion politico lo tin di haber cu cualkier presion politico.
Den oranan di trempan fraccion di AVP sosteni pa parlamentario di RED, Ricardo Croes, a entrega un peticion na gobernador pa pone presion pa no haci uzo di e scanner durante e eleccion 2021. Wever-Croes a desmenti cu door di e presion aki, nan a dicidi di no sigui cu e idea di bin c’un scanner den eleccion 2021.
Glenn Thode, Presidente di Conseho Nacional Electoral, siman pasa a splica cu ora cu ta asina leu cu sa cuanto partido ta bay participa, e lo tuma un decision di scanning. T’asina tambe, cu den ultimo dianan a flexibilisa e medidanan na Aruba y esey tin su repercusion pa eleccion y pa e peticion cu Crisis Team a haci na Censo pa cu e medidanan di Covid den eleccion.
Dialuna ora cu a anuncia e flexibilisacion, e siguiente paso ta pa sinta cu tur stakeholder cu nan a pidi pa ta mas estricto den nan medidanan y pa mira kico si y kico no mester. E reunion a tuma luga diaranson merdia y hunto a tuma e decision di cu e scanner no ta necesario mas.
E demas medidanan, mas urna, mas distancia den e urnanan, cu lo ta algo cu mester tene cuenta cu ne, handsanitizer den e urnanan. Mester bisti tapaboca henter rato. E entrega ora di bin ora di trece e carch’i votacion, e scanning cu ta tuma luga di e QR code. Esey ta suficiente den e fase codigo geel cu Aruba ta den actualmente.
Si e reunion a tuma luga prome, lo por a tuma un decision prome. Den caso cu e cantidad di contagio subi un biaha mas, prome minister a bisa cu ta dificil pa predeci ki decision ta bay tuma. Pero no ta kere cu no por bay bek den scanning, ya cu no tin tempo mas. Definitivamente, eleccion 2021, no lo haci uzo di scanning, prome minister a finalisa bisando.
