E ser humano a wordo crea pa tin su propio boluntad y p’esey lo e por scoge entre bon y e malo. Si e scoge e malo lo e cosecha e malo y si e scoge pa bon lo e tin abundancia di e bon. Nos tur ta liber pa tuma nos decision y scoge. Nos a lanta riba e isla aki caminda cu nos por a drumi bentana habri y lanta mainta baña cu awa di regenbak.
Nos pueblo di Aruba ta consisti di hende humilde y semper unda cu bo yega bo ta bonbini. E Arubiano di antes tabata un hende hopi amabel y cariño y semper ta gusta comparti. Nos por corda cu diabierna santo tur luga tabata cera y misanan rond di Aruba ta yen. Mesun cos e temporada di fin di aña caminda famianan ta bin hunto y ta celebra e dianan di Pasco y fin di aña. E nucleo familiar semper a hunga un rol hopi importante. Comparti den famia.
Mas nos pueblo a aleha for di Dios mas pio nos situacion a empeora. Nos por mira cu crimen a lanta cabes y ta bin cu tur sorto argumento pa hustifica pakico nos situacion e isla aki cada dia ta bira pio. Por uza tur sorto di strategia pa asina di purba di trece e cambionan pero si nos mira e realidad, cos ta bira pio. Den hopi aspecto nos como mayor ta faya paso en bes di obedece nos mayornan nos kier pa nos mayornan obedece nos den nos barbaridadnan. Nos no ta coregi nos yiunan y hopi biaha nos kier tapa pa nan.
Nos a aleha for di Dios y a tene man cu scuridad. Informacion cu nos tin ta cu tin casnan aki na Aruba tin e altarnan di santeria. Hende cu a drenta e casnan aki a informa cu nan ta sinti hopi miedo ora nan mira tipo di cos asina den cas. E ser humano semper ta den buskeda di algo pa yena e bashi cu nan tin nan curason. Locual cu bo hinca bo bida aden lo cobra bo den futuro. E palabra di Dios ta bisa cu e enemigo ta bin pa mata horta y destrui pero Hesus a bin pa duna bida na abundancia. E enemigo semper ta presenta bo algo bunita pa conkista bo y ora bo cay den su trampa bo destruccion ta na caminda. Esaki ta e lo bo cu ta bisti na carne, tambe ta wordo yama angel di luz. Importante den nos bida ta cu nos por cuminsa malo pero ta keda na nos cu ora nos wowo cera nos ta caba bon. Esaki tambe ta bo boluntad.
Nos por mira El Salvador un pais cu pa hopi aña tabata den e topnan di tur sorto di crimen y morto. Un pais cu bo no por cana den marduga paso mainta nan lo haya bo morto. E pueblo Salvadoreño a scoge pa un president cu un fe cristian y awe ta un di e paisnan mas safe den Centro America. Un pais cu a cansa di biba den violencia y asesinato. Mar Salvatrucha tabata controla tur cos na El Salvador. Dia 27 di maart 2022 tabata tin caso caminda 62 persona a wordo mata pa e gang aki. Esaki a pone cu e president di El Salvador Nayibe Bukele a declara un estado di emergencia na El Salvador. For di e tempo ey a cuminsa cu un accion cu man nan duro contra di Mar Salvatrucha y awe tin 60 mil di miembro di e gangnan aki deteni. E resultado di e accion aki ta cu awe e habitantenan por biba na paz y El Salvador su economia a cuminsa crece. Nacionnan Uni a critica e presidente Bukele pa e derechonan humano pero el a pone Nacionnan Uni na nan luga. Nacion nan Uni no a haci nada pa paisnan manera Venezuela, Cuba, China y Nicaragua caminda hendenan ta wordo tortura y mata. Awe e president di El Salvador tin respaldo di su pueblo y mas cu 94% di e pueblo di El Salvador ta desea di bolbe eligie como president pa e cambio el a trece na El Salvador. E medionan cumpra mes ta admiti cu su acogida ta di 88%. Un president Cristian cu ta honra Dios. Un pais cu ta honra Dios ta wordo lanta pero un pais cu ta deshonra Dios lo no tin progreso sino lo tin miseria y aumento di crimen. No tin respeta pa opinion di otro y ta crea cualkier motibo pa destruccion.
Pueblo di Aruba nos ta den e ultimo dianan di aña 2022. Esaki ta un bon momento pa nos pueblo refleha y tuma un decision pa locual ta trata nos futuro y nos bienestar di nos isla. Nos ta den e dianan di fiesta cu nos ta recorda nacemento di Hesus. Si mayoria ta prefera di bay contra e leynan di Dios anto no tin motibo pa celebracion di Pasco y nos mester lubida di biba na paz. Hesus ta e Rey di Paz. Tevreden, Berlis y Guedez sa caba cu partido MEP ta pro e matrimonio di mesun sexo y e ley aki lo wordo aproba den Parlamento. Ta keda na e parlamentarionan aki pa tin e curashi pa dicidi y esaki ta e tempo y pone un punto final y no keda bira rond. “Hombre cobarde no va a la guerra.” Laga e decision ta den man di pueblo. Pueblo di Aruba esaki ta nos ultimo mensahe pa aña 2022 y nos di partido Curpa kier gradici nos comunidad di Aruba pa e mensahenan di apoyo y tambe nos kier desea henter nos pueblo di Aruba un Bon Pasco y un Prospero Aña 2023. Cu e paz, amor di Hesucristo por reina den cada hogar aki Aruba y cu nos bon Dios establece su reino y boluntad den nos bida.
