Na aña 2025 Aruba un biaha mas ta bay urna electoral pa asina scoge su proximo gobierno. Aunke oficialmente ainda campaña no a cuminsa, tur cos ta mustra cu campaña ta on.
Ya nos por mira bandera riba auto caba. Loke ta duna partido Curpa mas ainda e impresion cu campaña ta on tambe ta e mocion cu partido RAIZ a pasa den parlamento recientemente y aprobacion di e presupuesto supletorio. E mocion di partido RAIZ pa adulto mayor no paga pa remedi a wordo aproba den Parlamento. Laga nos no spera cu e lo keda na mocion so paso tin hopi mocion cu nunca a cumpli cu nan. Ta bon pa partidonan den parlamento realisa e perdida di poder di compra di nos adultonan mayor.
P’esey partido Curpa ta urgi e parlamentarionan pa kita e prima di AZV di nos adultonan mayor cu tin di sobrevivi di un pensioen so, pero tambe di esunnan cu tin dos pensioen. E pensionado cu dos pensioen ta wordo confronta cu extra belasting paso ta pone e dos pensioennan hunto. Despues cu gobierno a introduci NPR y hisa edad di pensioen na 65 aña e suma cu ta cobra na pensioen a baha considerablemente. Tristo ta cu esunnan cu a sinta 8 aña como minister of parlamentario si tin un pensioen di 70%.
Aprobacion di e presupuesto supletorio na opinion di partido Curpa tabata tin como meta drecha e imagen di partido MEP pa di e forma ey perde menos voto den e proximo eleccion. Pa prome biaha den historia empleadonan publico lo ricibi un aumenta pa medio di indexering den nan salario. Nos tur sa cu e situacion financiero no ta bon. Nos tin un parlamento cu no ta controla gobierno con placa di pueblo ta wordo administra.
Aruba no tin su jaarrekening na ordo y for di 2019 no tin un jaarrekening. Ademas gobierno ta mal pagado paso tin comerciante cu ta warda riba pago. Esaki ta duna nos di compronde cu parlamentarionan cu ta bisa cu gobierno ta paga debe no sa cuanto debe gobierno tin riba caya. Tristo ta cu ta hinca nos comerciante den problema financiero.
Nos por a mira cu diabierna pasa gobierno a celebra clausura di luna di orguyo. Tin pais a prohibi e fiesta paso e ta bay for di man. Nos ta un isla cu nos unico entrada ta bin for di turismo. Nos gobernantenan no ta consciente cu e celebracion aki por hinca nos Isla den problema si turistanan dicidi di no bin nos Isla pa via di e celebracion aki.
Nos por corda cu Target, Budlight y Walt Disney a hiba un perdida biyonario. Den e 3 companianan ey nos ta papia di mas cu 25 biyon di dollar y Aruba su economia ta draai rond di 6 biyon florin.
Aruba mester di un cambio. Politiconan ta sigui insisti cu mester tene estado for di religion. Nos conoce cu gobierno tras di gobierno a tene Dios for di gobierno. Resultado ta cu nos debe nacional a subi for di gobierno tras di gobierno sin Dios.
Parlamentarionan ta grita pro ora di vota den Parlamento pero sin sa kico ta e realidad. Nos supuestamente parlamentarionan cristian ta keda colga na gobierno sin proteha interes di e pueblo. E puesto ta pasahero y locual cu bo sembra lo bo cosecha. Partido Curpa ta e unico partido cu ta para pa e famia y pa nos mucha nan.
Partido Curpa ta e unico alternativa.
