Nos por a tende cu gobierno a paga e overbruggingstoelage na e parlamentarionan cu a keda un luna sin cobra. Pa hustifica e pago di e overbruggingstoelage aki mester trece un cambio den ley pa e minister no haya su mes den problema. Nos por mira cu nan interes ta na prome lugar y no interes di ningun otro hende. Tin pa nos politico, pero no pa nan e pueblo. Nos por mira cu pa parlamentarionan ta core regla nan overbruggings-toelage pero empleadonan publico mester bay huez pa haya nan derechonan. E parlamentarionan den 5 minuut ta core regla ora ta trata placa pa nan mes y ainda e politico/gobernante tin e pudor di sclama cu nan ta traha pa pueblo.
Nos tin empleadonan publico cu mester a entama casonan na corte pa via cu nan landsbesluit a wordo mal traha y cu aña pasa huez a dunanan rason. Tin empleadonan publico cu mas di 30 aña di servicio pa via di malesa mester a bay den exterior pa tratamento pa nan por a haya nan salud y awe mester bay corte pa nan haya nan promocion. Tin differente sentencia na unda e personanan aki a gana nan caso.
Nos por mira cu masha hopi tempo caba cu e bienestar di pueblo di Aruba no ta na prome lugar. Cada dia cu e gobierno aki keda na poder mas y mas nos Aruba dushi terra ta zink y ta hasi e proceso pa Aruba recupera mas dificil y mas largo. E ta un situacion caminda cu pais Aruba ta perdiendo tur locual cu ta keda di nos Status Aparte. No tin amor pa nos Aruba dushi tera sino amor pa nan mes cual ta nan cartera. E amor pa pueblo ta ficticio y tin un nomber “medida”.
Gobierno a bolbe haya un NO grandi di parti di gobierno Hulandes pa locual cu ta trata placa pa cerra e buraco grandi cu tin den e presupuesto 2022. E presupuesto 2022 lo no wordo aproba pa CAFT tampoco. Nos por mira cu inflacion na Merca a subi na 7.5% y nos aki na Aruba lo bay sufri e consecuencia, paso costo di bida lo bay subi drasticamente. Esaki sin conta cu prijs di awa y electricidad tambe lo bay subi paso e companianan estatal no tin placa pa absorba ningun sla mas. Na final di cuenta e pueblo lo wordo hiba na e altar di sacrificio, paso tur e pesonan di e medidanan impone pa e gobierno lo cay back riba lomba di e pueblo di Aruba.
