Cas Real semper ta demostra hopi cariño pa Aruba y interes den con cosnan ta bayendo pa nos Pueblo y País. P’esey e contacto cu Cas Real tur ora ta yen di aprecio y afeccion pa Aruba. Esey no tabata otro na momento cu e delegacion di oposicion di Aruba a hiba un bishita personal cerca un amiga grandi di Aruba, Prinses Laurentien.
A intercambia di idea riba e proposicion pa yega na realisa un Sociaal Cultureel Planbureau pa Aruba. Prinses Laurentien tin hopi iniciativa den cual su enfoke ta pa yega na scucha kico ta e dolornan den comunidad.
Den e cuadra ey e concepto di un instituto cu ta haci gobernantenan, parlamentarionan mas informa y consciente kico ta e dolornan, necesidadnan y aspiracionnan den comunidad ta sincronisa cu temanan cu Prinses Laurentien ta dunando hopi atencion.
E hospitalidad di Prinses Laurentien un bes mas tabata hopi caluroso y atento pa cu e bishita di e delegacion di politiconan Rubiano cu e conoce hopi aña.
Na final di e encuentro caluroso aki a expresa cu Aruba ta contento cu den Reino nos tin un famia Real cu un curason grandi pa Aruba. Y awe nos por a toca un punto común: “Mensen moeten gezien, gekend en gehoord worden”. Esey ta un sentimento y mision cu nos ta comparti cu Prinses Laurentien, tabata e mensahe di e delegacion.
