Awe mr. Mike Eman, ex-Minister presidente di Aruba y actual lider di partido di Pueblo Arubano (AVP), a manda un caluroso carta personal pa Minister-President Mark Rutte pa gradicie pa e colaboracion durante tur e añanan y pa felicit’é cu su nombramento como Secretario-General di NATO. Den su carta, mr. Eman a enfatisa tanto e cierre importante di e termino di servicio publico impresionante di Rutte como Minister-President di Hulanda como su rol nobo y prestigioso den NATO.
Mr. Eman: “Ora mi a yega na final di mi termino como Minister-President di Aruba, mi a ricibi di bo un bunita carta di gradicimento pa loke nos a logra hunto den representacion di nos Reino. Mi tambe tin recuerdonan special di e strategia cu nos a desaroya pa pone Aruba hunto cu e Reino riba e plataforma internacional como un ehempel y lider den sostenibilidad.”
Mr. Eman tambe a expresa su gradicimento di curason y aprecio pa e colaboracion y e relacion personal cu nan a desaroya durante nan termino di oficio. E a recorda e colaboracion valioso entre Aruba y Hulanda, y e esfuerso hunto pa pone Aruba y Hulanda riba e plataforma internacional como un lider den sostenibilidad. E tambe a recorda e esfuerso conhunto pa logra pa e asiento pa Reino den e Conseho di Siguridad di Nacionnan Uni y e tantisimo representacionnan intensivo internacional exitoso.
Un momento particular den e carta tabata e recuerdo di e momentonan informal despues di un dia largo di trabou, unda nan ta comparti un cerbes riba trapi di un residencia di un embahador evaluando e dia. E momentonan aki a profundisa nos relacion pa sirbi nos paisnan, Eman ta enfatisa.
Mr. Eman: “E potret di nos actuacion hunto na e Cumbre di Las Américas, cu mi a regala na bo durante mi ultimo bishita, mi ta spera lo haya un bon luga den bo oficina di NATO, como un recordatorio cu e proteccion di e integridad teritorial di nos islanan tambe lo keda den bo atencion”.
Mr. Eman a expresa su confiansa cu Mark Rutte lo desplega su rol nobo como Secretario-General di NATO cu mesun dedicacion cu su rol como Minister-President.
Na final di su carta personal, Mr. Eman a invita Mark Rutte pa sigui bishita Aruba y ta spera cu nan caminda lo crusa otro di nobo den futuro. El a expresa su respet di curason y admiracion pa tur loke Mark Rutte a logra como Minister-President y pa e contribucion futuro cu e lo duna na comunidad internacional.
