Den un declaracion ricibi for di e compania local di distribuimento di coriente, ta duna un splicacion di kico a pasa den e incidente diamars den oranan di mainta. Aki un contratista di ELMAR a perde su bida. “ Cu gran tristesa, ELMAR ta confirma un sucedido tragico cu a tuma luga awe mainta, diamars 2 di juli 2024, den cual ta envolvi un di nos contratistanan cu hopi aña di experiencia. Durante trabou di mantencion rutinario pa corta mata riba area publico cu ta stroba nos liñanan di luz di caya, un contratista lamentablemente a fayece.”
Den e momentonan aki, e causa di fatalidad no a wordo confirma pa autoridad ainda. ELMAR ta realisando un investigacion, y alabes colaborando cu autoridadnan local pa identifica e circunstancianan rond di e accidente aki.
Nan ta splica cu regularmente ELMAR ta contrata companianan pa snoei mata cu ta pone un riesgo inmediato pa infrastructura di e compania. Esaki ta trabounan necesario pa siguransa y confiabilidad di e grid.
Patrick Thode tabata un contratista balioso, cumpliendo mas cu un decada eherciendo e tipo di trabounan aki pa ELMAR. “Nos pensamento ta cu e famia, amigonan, y coleganan di e fayecido durante e tempo dificil aki. Gerencia di ELMAR ta extende nos mas profundo condolencia y forsa na e famia.”
