Temporada di campeonato entre e baristanan di Starbucks t’ey atrobe! Anualmente Starbucks ta enfoca den duna atencion na crea y conecta, algo cu tur participante ta haci diariamente den e tiendanan. Recientemente a tene e competencia den e tienda di Starbucks situa den Renaissance Mall y den cual Elisabel Maduro a resulta e ganado absoluto. Lo saca un ganado di tur tienda Starbucks na Aruba, pa despues competi pa e ganado nacional!
Kico ta un barista campeon? Esey ta un barista cu ta inspira y guia otronan cu su compromiso den prepara e calidad di koffie mas halto posibel y tin un un bon conocimento di su clientenan, na tur momento.
![](https://24ora.com/wp-content/uploads/2022/07/Elisabel-Maduro-1-1080x1440.jpg)
Un barista campeon ta un hende cu ta crea un ambiente caluroso den su tienda, door di tuma iniciativa pa saluda y gradici tur cliente. E ta continuamente traha riba e confiansa necesario cu su demas baristanan door di un bon conexion y demostra un actitud masha positivo.
E comportacion aki, combina cu un enfoke den crea y sirbi bebida di calidad halto so, ta e modelo di liderazgo cu ta rekeri pa entrega e expectativa di Starbucks, pa ta considera un berdadero Starbucks Barista Champion. E campeonato regional pa e aña aki lo tuma luga na Starbucks Hacienda lsacia Alajuela, na Costa Rica, dia 8, 9 y 10 di november 2022.
![](https://24ora.com/wp-content/uploads/2022/07/BC2.png)
Pa loke ta Aruba, ya caba a eligi e campeon di Starbucks Renaissance Mall y pronto lo saca e ganado na Renaissance Marketplace. Despues lo saca e Barista Campeon di henter Aruba cu lo bay representa nos isla na Costa Rica.
Elisabel Maduro, e barista campeon di Starbucks Renaissance Mall ta trahando cu e compania pa 8 aña caba y ta un “Shift Supervisor” na Starbucks Renaissance Mall. E ta un “Coffee Master” y como tal, ta un bon conocedo di e productonan pero tambe con pa prepara cada un di nan.
![](https://24ora.com/wp-content/uploads/2022/07/BC1.png)
Tocante Starbucks
Jerry Baldwin, Zev Siegl y Gordon Bowker a funda Starbucks dia 30 di maart 1971 na Seattle, na Merca. Starbucks ta e cadena di “coffeehouse” mas grandi di mundo. Na november 2021, e compania tabata conta 33.833 tienda situa den 84 pais. Ta bon pa menciona cu 15.444 tienda ta situa den e continente Mericano. E ta conoci pa su productonan deriva di koffie, ‘refreshers’, te, productonan horna y sandwich. Ademas di bebida y alimento, hopi tienda ta ofrece producto oficial di Starbucks, manera mugs, tumblers, glas y varios producto di koffie pa por prepara na cas mes of na trabou.
![](https://24ora.com/wp-content/uploads/2022/07/Elisabel-Maduro-2-1080x1440.jpg)
Starbucks na Aruba
Aki na Aruba nos conoce cinco tienda di Starbucks, situa na Renaissance Marketplace, na Renaissance Mall, na Paseo Herencia Mall, den lobby di Aruba Marriott Resort & Casino y den Gloria. E prome Starbucks a habri dia 22 di november 2009 den Renaissance Marketplace. Awendia Starbucks Aruba ta domina e mercado di coffeehouse, ta emplea 60 asociado cu diariamente ta atende hopi cliente. Starbucks Aruba & Curacao ta un compania bou di e hala di Renaissance Wind Creek y ta bou maneho di Wanda Broeksema.