Mas of menos 11,3 miyon di Mericano a vota ya den 38 di e 50 estadonan di e pais ora cu falta 21 dia pa e eleccion presidencial, segun e Proyecto Eleccionnan di Merca, dirigi pa Michael McDonald, profesor di e Universidad di Florida.
Di acuerdo cu e proyecto aki, e aña aki lo bay tin casi 240 miyon di persona habilita pa vota pero no tur di nan ta registra pa haci esaki y hopi no ta participa na e votacionnan.
Durante e eleccion presidencial anterior, cuater aña pasa, tabata tin 138,8 miyon di voto, esaki ta aproximadamente 60% di e contingente di votantenan habilita.
E deposito di voto di e ciudadanonan registra como democrata ta supera den cantidad e voto di e electornan registra como republicano, pero McDonald a adverti cu “e fuerte voto democrata na e altura aki no mester ta un indicacion cu (e candidato democrata Joe) Biden a gana e eleccion.”
“Pero si, e cifranan ta mustra hopi bon pa Biden,” el a añadi.
“Su campaña mester ta complaci dado cu e por probecha di e votonan ya obteni pa enfoca di manera mas eficiente entre e simpatisantenan cu no a vota ainda. Sin embargo, ta hopi probable cu e republicanonan ta concuri masivamente na vota personalmente,” McDonald a indica.
Presidente Donald Trump ta repudia y a señala, sin prueba, cu e alternativa aki ta susceptibel na fraude.
Onderschrift potret: Prome dia di votacion anticipa pa e eleccion presidencial Mericano, den e stadion State Farm Arena na Atlanta, Georgia. EFE/John Amis
