Hopi biaha na momento cu un cancion bira popular, esun cu ta haya e fama ta e cantante. Sinembargo e creador of esun cu a percura pa e popularidad aki mes ta tras di “pantaya”. Si menciona e nomber Edward Silberie poco hende lo reconoce. Probablemente esunnan cu ta sigui e medio artistico hopi di cerca lo reacciona “ah”, pero pa e ciudadano comun y coriente no ta un nomber conoci. Pero den mundo artistico nos tin un Rubiano grandi.
Silberie hopi biaha ta tras di camara y productor visual di cancionnan manera Savaneta, Miss Dior, Sak bay Piki, De Que Me Vale y hopi mas.
Mark-Benson Denz di 24ora.com su Miami Desk, a subi yate na Miami pa entrevista Silberie riba e ultimo desaroyonan den mundo di musica y entretenimento.
Edward Silberie ta productor, editor, videografo y mucho mas. Su presencia regular na Miami a hala atencion di 24ora.com y a dicidi di combersa cu ne riba kico tin andando. E ta traha hopi di cerca cu Jeon y mayoria di e proyectonan cu e artista Rubiano a laga cerca otro artistanan na Merca, e ta encarga pa finalisa, o sea pone e toke final. Pero tambe proyectonan di Aruba, e ta probecha pa edit nan na Miami.
Ultimo aki el a graba cu Icons y Jeon na Paris, na Den Haag a graba un cantica cu pronto lo ta riba mercado y awo na Los Angeles ta grabando videoclip di un cancion cu el a produci cu Oscarcito y Andy Paradise.
Por a compronde cu ultimo tempo Silberie a laga su pasion pa musica un banda pa enfoca riba video. “Musica ta mi bida. For di chikito y mi infancia mi a traha musica.” Durante su trabou cu Jeon dado momento a surgi e idea pa cumpra un camara y pone riba film loke e ta hinca den musica. Esaki e no a mira como un mal idea, mirando cu el a studia Audio Engineering y tabata comparti camber cu studiantenan cu tabatin camara. Pues e tabatin basta conocemento caba di e area ey.
Na Aruba no tabatin un persona den e area aki y nan a dicidi di cumpra un camara y cuminsa enfoca den e ramo aki tambe. “Pero semper musica a keda den banda toch. Hopi cerca. Awo den su mayoria mi no ta produci musica. Pero mi ta pone artista y productor traha cu otro. Y percura pa e mix di stemnan etc.”
Pa talentonan local por subi e trapi internacionalmente, ta importante networking, mester bay afo y trata di habri frontera. No keda warda pa aprobacion di publico of los un cancion. Kere den bo producto y lenguahe,” ta loke cu e ta recomenda.
Na Miami el a ripara cu e artistanan ta gusta e cultura di Aruba y p’esey e artista / talento local mester kere mas firme den su producto. E artistanan ta experencia e musica di Aruba como algo otro, algo cu nunca nan a scucha y e zonidonan ta diferente. P’esey Danza Dub cu Jeon a crea a logra drenta cerca artistanan internacional. Awo mes tin na caminda cu Jowell ( Puerto rico) un produccion andando, cu ora nan a scucha e zonido, di biaha a subi riba dje. Pues nan tabata kier e zonido ey.
Tambe a papia cu Silberie riba e cambionan cu tin cerca e fanaticonan. Antes ta saca un produccion, un cantica, y despues di algun luna ta bolbe saca otro. Pero awendia e demanda ta diferente. Nan kier mira cancion nobo mas rapido. Y no spera cuater luna pa otro producto. Y esaki ta mescos pa videoclip. Awo cu presencia di TikTok e fanaticonan no ta bay spera te ora cu keda cla cu un produccion di 10 mil dollar. Pa nan no ta importante esey. Nan kier mira e video di e cantica hopi lihe. P’esey el a cuminsa graba cu su mesun celular. Ademas wowo di e hendenan ta custumbra caba cu e sistema aki riba rednan social. Pues e aceptacion ta bon.
Y como musico, e sa e diferencia entre produci musica y produci video. E sa con pa hiba e feeling di cada musica den un video. Esaki pa e hendenan sa p.e. con pa baila cada tipo di musica. Mester transmiti e sentimento di un cantica bailabel den un video. Pa e hendenan no bay baila e cantica mucho slow y cada un tin su concepto pa cual tipo di hende e ta dirigi na dje.
Miami mes tin hopi talento. No lubida, el a splica, cu tin switch di generacion, ya Daddy Yankee a retira pa haci otro cos. Ozuna tambe ta preparando pa retira. E industria ta draai pero ta en espera di algo nobo.
Na e momentonan aki e ta trahando cu Jeon riba un proyecto pa mucha. E ta un 2D di cartoon na Spaño. E ta un album di dies cantica. Ta traha cu Jeon pa haci’e na Papiamento tambe, cu e intencion pa introduci esaki na e scolnan di Aruba.
E conseho di Silberie na talentonan local ta pa nan semper kere den nan mes. “Kere den bo mesun locuranan. Traha duro, sacrifica, disciplina bo mes. E por nifica dedicacion hopi ora den un proyecto.”
