Presidente di Parlamento mr. Edgard Vrolijk a encabesa e delegacion di Parlamento cu a biaha pa Hulanda. Aki a participa riba diahuebs den e reunion Tripartiet mientras cu diabierna ta cuminsa e encuentro di e diferente parlamentonan di Reino Hulandes.
E delegacion di Aruba ta uno basta grandi. A biaha un of mas miembro di e diferente fraccionnan den Parlamento. Segun Vrolijk a splica, e delegacion ta consisti di 12 persona, incluyendo e Griffier di Staten. Tin dos miembro a bini riba nan mes, pues ta participa como “toehoorder”. Ta trata aki di Ricky Hoek (MEP) y Aquannette Gunn (MAS). Asina mes, nan por participa den e reunionnan.
Si tabata notabel, segun Vrolijk, tin un parlamentario no a acudi na e reunion cu Raad van State y pa esun di Tripartiet a bisa cu e lo yega un tiki laat, pero den oranan di merdia pa atardi cu e encuentro ta casi finalisa, e no a yega ainda. “Na ningun reunion e no a participa ainda y e unico cos cu el a bisa ta cu e lo yega laat.”
E parlamentario di Accion21 a biaha for di dia 29 di mei caba pa Hulanda, mientras cu e prome reunion tabata dia 5 di juni. “Mi ta lider di delegacion berdad, pero si bo no informa mi, mi no ta bay cana bo tras pa puntra unda bo ta. Nos ta hende grandi. Bo sa cu bo tin un trabou pa haci, Parlamento ta pagabo y bo mester ta presente aki.”
Parlamento ta paga pasashi pa tur e miembronan di delegacion y e daggeldvergoeding ta cuminsa dia 3 di juni y ta core te cu 11 di juni.
Parlamento tin un comision, presidi pa Hendrik Tevreden, kende por yama un parlamentario den un situacion asina aden pa papia cu ne. “Eyden e mester duna cuenta.” Y a agrega cu e no ta algo normal, pero den su periodo cu e ta presidente, el a yega di sosode.
