Dialuna mainta tabatin un walk-out di parti dje trahadonan di Arubus, unda cu nan a expresa nan malcontento riba e structura di salario cu gerencia a implementa entrante prome di december. Sindicato SEPPA, cu ta representa e trahadonan, a indica cu tin combersacion na mesa cu mediador pa intermedia entre ambos partido, pero cu Arubus no ta respeta e proposicion haci y esaki no a cay na agrado dje trahadonan.
Arubus tin hopi luna pa no bisa aña bezig, segun director di Arubus Eddie Mohamed. Fo’i 2021, nan a cuminsa cu Deloite, pa traha cierto rapport pa Arubus. Nan a ricibi informacion di Arubus, cual nan a hinca den otro y a traha un herarkia nobo, como tambe functiebeschrijving, cual ningun trahado awendia lo tin. Nan a haya aworaki un functiebeschrijving, cu a bin mara na un functiewaardering. Esaki ta mustra ki peso e trabao tin, cu ta cuadra e ora cu salario.
A duna gerencia un structura di salario y aki Arubus a haci su trabao pa mira cua lo cumbini tanto e trahado como e compania.
Esaki tabata un trabao bastante grandi, Mohamed a splica. Un problema cu tin na Arubus, cu no ta gusta e realidad y e realidad ta cu e situacion financiero ta precario.
E director a agrega cu ocho di e trahadonan aki so, tin caminda pa crece. Tur e resto a yega e top di nan schaal. Aki ta algo cu tambe tin di tene cuenta cu ne. Den e structura nobo, 44 persona lo tin chens pa sigui crece, unda nan por mira unda nan ta y cua lo ta su top.
Esaki tin su costo cu ne. E lo bay costa e compania mas placa, segun Mohamed. Pero a lo largo, aki cinco aña padilanti, mirando cu ta bay tin hende cu lo bay cu pensioen y e gasto di personal aki cinco aña lo bay cuminsa baha. Esey ta algo cu Raad van Bestuur y e accionistanan a haya nan mes cu ne, cu e plan aki, obviamente ora bin cu un structura nobo, lo bay costa placa. Pero e trayectorio di e structura nobo, por mira cu e cifranan ta mustra di dies aña largo, con e lo yuda e compania con e lo yuda baha e gastonan di personal.
E director a menciona cu e cambio cu ta bin no tin ni un empleado cu ta bay atras. Tur ta bay dilanti. Esunnan cu a yega nan maximo, a yega na maximo, no por crece indefini. Pero mayoria, esta 44 hende, lo tin caminda pa sigui crece bay dilanti, el a enfatisa.
