Den fin di siman 24ora y matutino Trempan a tuma contacto cu Eddie Bennett, Secretario General di Transforma PPA, pa loke ta e postura di e partido. Diadomingo tabata mustra cu e partido no tabata na benta. Sinembargo por a mustra un remodelacion completo.
Den nos edicion di dialuna den matutino Trempan, Bennett a comenta cu tabata deseo di difunto Benny Nisbet pa e continua como lider di e partido, cual peticion, supuestamente e lo cumpli cu ne.
Y nos ta cita: “Ta deseo di nos defunto lider pa nos mes sigui cu e partido y pa participa den eleccion. Dos siman prome cu Benny Nisbet a fayece ainda el a referi na participacion y ideanan di PPA pa e siguiente eleccion”, asina Eddie Bennett a confirma den edicion di dialuna di matutino Trempan. El a laga sa cu nan ta den pleno preparacion pa bay eleccion y e mes ta lider tambe. Riba nos pregunta cu si tin dos ola den e partido, esta un cu ta na fabor di Marisol Lopez-Tromp y otro na fabor di Lisette Malmberg, el a desmenti y sigura cu ta un ola tin y esey ta cu PPA ta sigui activo den politica cu nan mesun lista.
Interes pa bruha tera
Di acuerdo cu Eddie Bennett, e rumornan relaciona cu posibel tumamento over di partido PPA no ta sali for di nan, sino mas bien di e politiconan interesa den nan partido. Di otro banda, tin hende ta opina y papia di ola den seno di partido, siendo cu nan no sa bin reunion mes, no ta atende partijraad y de facto, no sa mes kico ta sosodiendo internamente den partido. Nan kisas no sa cu e partido ta preparando pa participa nan mes den e siguiente eleccion, cu nan mesun candidatonan, nan propio ideanan di gobernacion y determina pa logra asiento pa representa pueblo den parlamento y eventualmente como partner den un coalicion.
Un buelta di 180 grado
Sinembargo cos a resulta di ta diferente. Ta mustra cu tur loke cu Bennett a bisa, simplemente tabata un engaño y awo, tin un lider nobo, den persona di Lisette Malmberg, cual relansamento di partido PPA den su ‘branding’ nobo como TransformA PPA.
Na momento cu a adresa Bennett riba e postura aki, el a comenta durante di e relansamento cu el a opta pa no bisa loke tabata bezig cu ne. Sinembargo e partido ta keda riba e mesun rumbo cu a papia, nificando cu no tin ningun cambio. Tabata riba caminda pa transforma y diahuebs tabata e momento pa divulga. El a enfatisa cu PPA no tabata na benta.
Den un intento pa scapa Bennett di un berguensa total, Lisette Malmberg, lider ‘nobo’ di e partido transforma, a splica cu un cos cu e ta kere ta locual el a bisa. Otro cos ta locual por a interpreta. Locual cu Bennett a bisa, pasobra un pregunta haci cu si tabatin dos coriente den PPA. Bennett su contesta cu tabatin un solo coriente y Malmberg ainda ta lidera e partido den e sentido y loke el a bisa ta completamente berdad.
Eddie Bennett, te cu diahuebs oficialmente tabata presidente di e partido. Esey ta nifica cu Bennett no a gaña, e no a inventa nada, Malmberg a enfatisa. El a djis no divulga e plenitud di loke tabata pasando. No por a hacie ainda. Ainda e congreso y e proceso completo legal cu ta uno cu kier a cana den un forma corecto, mester a tuma luga y esey a tuma luga, cu e congreso di miembresia, di partijraad y di e hunta te cu diaranson anochi, Malmberg a aclaria.
Esey por a causa un tiki confusion. Malmberg a agrega cu nan campaign manager a purba di clarifica e asunto e mesun mainta prome, pero no tabatin oido p’e. A sigui cu e publicacion. Aworaki ta parce cu toch esey no tabata e interpretacion corecto cu mester a duna na palabranan di Eddie Bennett.
Pa loke ta e bus, pa aclaria, De Palm Tours a sponsor e partido e uzo di un bus. Nan no a regala e bus, sino e uzo di e bus. E ekipo di transforma y cu fondonan di e partido a pone e transformacion di e logo y tur e ‘branding’ di transforma y di PPA riba dje. Tin biaha ta bay hopi tras di rumor den comunidad. Ta bon pa siña bay na e fuente y warda pa e contesta corecto.
