Ora nos mira actitud di hende mundialmente, sabiendo cu nan ta robes, sabiendo cu Dios ta rechasa, nan manera di pensa y actua, pero cu toch nan ta sigui cu nan pia riba e pedal di rebeldia contra palabra di Dios. Nos ta pidi Dios misericordia y pordon.
Nos sa cu e diabel kier mantene hende ciego, pasobra hopi no kier bini na e luz, hopi no kier sali for di pica, pasobra e luz a bini den mundo y hende tabata stima e scuridad mas cu luz, y esaki ta e condenacion (Juan 3:19).
Ki ora hende ta haci wega cu Dios?
· Ora bo sa e Berdad, pero bo no kier aplic’e den bo bida, hogar y trabao, pero bo ta complace cu maldad.
· Ora hende sa cu Dios no ta aproba inmoralidad y maldad, pero toch nan ta persisti pa apoy’e.
· Ora hende ta haci tur posibel uzando conocemento, sabiduria y rikesa pa rebeldia contra Dios.
· Ora Dios su mandamentonan no tin balor pa nos y ta poni un banda.
· Ora nos ta saca Dios completamente for di nos programa, pasobra nos sa 100% cu locual nos ta bezig cu ne Dios no ta apoya.
· Ora nos no ta worry cu Dios su presencia, pero nos orguyo, arogancia y propio deseo ta bini na prome luga.
Nan ta profesa cu nan conoce Dios, ma cu nan echonan nan ta nenga Dios, pasobra nan ta abominabel, desobedecido, y nan no ta sirbi pa nada bon (Tito1:16).
P’esey e palabra di Dios ta bisa nos den Romanonan 2:5: Ma pa motibo di bo capricho y bo curason cu no kier arepenti, bo ta montona, furia pa bo mes, den e dia di furia y revelacion di e huicio husto di Dios. Kende lo paga hende segun su obranan.
Pasobra for di paden di curason di hende, ta sali mal pensamento, fornicacion, ladronicia, matamento, adulterio. E echonan di cudishi, maldad, tambe engaño, sensualidad, envidia, calumnia, orguyo y bobedad. Tur e maldadnan aki ta sali for di paden y ta contamina hende (Marco 7:21-23)
Pasobra nos tur mester aparece dilanti di e tribunal di Cristo, pa cada un ta recompensa pa su echonan den e curpa, segun loke e a haci sea bon of malo (2 Corintionan 5:10).
Pasobra e tristesa cu ta segun e boluntad di Dios, ta produci un repentimento cu ta hiba na salbacion, y cual no ta duel hende nunca, ma e tristesa di mundo ta produci morto (2 Corintionan 7:10).
Repenti anto y converti, pa boso picanan ta kita, pa e temponan di refrescamento por bin for di e presencia di Señor y pa e por manda Hesus e Cristo destina pa boso (Hechonan 3:19-20).
Y Dios pasando por alto e temponan di ignorancia, awor ta declara na hende, cu tur hende na tur caminda mester repenti (Hechonan 17:30).
Si Mi pueblo cu ta yama na Mi nomber, humilia nan mes y haci oracion, y busca Mi cara y bira for di nan mal caminda nan, e ora ey lo Mi tende for di cielo, y lo Mi pordona nan pica y cura nan tera (2 Cronicanan 7:14).
Mi ta bisa boso no, ma si boso no arepenti, boso tur lo perece mescos (Lucas 13:3).
Y ki ora cu boso ta para haci oracion, pordona si boso tin algo, contra un hende, pa boso Tata cu ta den cielo tambe pordona boso, boso transgreshonnan. Ma si boso no pordona, boso Tata cu ta den cielo tampoco lo pordona boso transgreshonnan (Marco 11:25-26).
E tempo pa arepenti, y stop di haci wega cu Dios a yega.
Sinceramente,
Pastoor Marcel Balootje.
