Awe mainta fiscal mr. Rianne Wilderman a duna ordo pa detene dos sospechoso mas den e caso di bringamento y destruccion den Gusto Nightclub y Azia Restaurant. Parce cu e declaracionnan haci pa e demas sospechosonan y imagennan di video a saca afo cu tin dos sospechoso mas, esta Kevin Wever (yiu di lider di MEP) y Christopher Williams (yiu di lider di Pueblo Prome). Pero Wever no a duna e recherchenan chens pa deten’e na trabou of na cas, sino hunto cu su abogado a entrega su mes na ward’i polis na Shaba.
E caso a manera bay cu vakantie
E ultimo detencion den e caso aki tabata riba diasabra anochi dia 19 di december 2021, ora cu a detene Nigel Williams na cas di su welo den Olijfistraat na Dakota. Su siguiente diamars caba e ta un homber liber. Tabata busc’e pa tres siman largo despues di tabata envolvi den pelea cu yiu di Prome Minister di Aruba, esta Kevin Wever.
Remarcabel ta cu recherchenan a manera bay cu vakantie durante e investigacion, a permiti pa e sospechoso casa, haci fiesta, bay honeymoon bin bek y awo a deten’e. Ta cuestiona cu si ta tur hende ta duna e mesun trato preferencial asina den un caso penal.
E caso
Tabata diadomingo dia 14 di november ultimo cu tabatin un pelea den baño di Gusto Nightclub entre Nigel Williams y Kevin Wever. Esun ta acusa e otro di a coba su mama y scupie. Siguridad di dicho club a saca e bringadonan porta ‘fo mesora. Pero en bes di bay cas, a opta pa e ora bay come den Azia Restaurant y no a dura mucho cu e gang a topa cu otro atrobe. Ey a bolbe tira sla y den e proceso a kibra boter tira den e luga. Polis a detene tres hende caba den e caso aki. Kevin Wever a bay su mañan mes pa entrega keho na polis como victima, pero famia Williams ta insisti cu e ta e autor di henter e problema.
E caso aki a haya mas atencion cu normal pasobra ta trata aki di yiu di e politico Michael Williams di Partido Pueblo Prome y yiu di e mandatario Evelyn Wever-Croes, lider di MEP y alabes minister-president. Ambos ta contrincante pisa di otro den arena politico y ta parce cu e yiunan a opta pa sigui cu mesun ehempel aki, pero riba caya y cu masha agresividad.
Mester menciona cu luna pasa a detene e sua di Kevin Wever, esta Yowalfre Torres-Mendez, cu ta pareha di e yiu muhe di minister-president, Claudine Wever, kende tambe tabata cu Kevin durante e pelea. El a keda cera den cel na ward’i polis for di diabierna te cu diaranson.
Presion di Ministerio Publico
Mester menciona cu for di recherchenan encarga cu e caso a menciona cu nan a experencia masha hopi presion for di Ministerio Publico pa nan a detene Nigel Williams. Tabatin un hefe di recherche cu a nenga di cumpli cu e ordo aki y a hasta bay cu vakantie memey di e caso, como malcontento pa e forma con fiscal tabata atende cu e caso specifico aki. A logra convence e di dos den rango, pa e tuma e caso over y bay over na detencion. Pero e tambe a para riba cu si detene Williams, mester detene Wever tambe, cu aparentemente t’esun cu a tira boter y corta e trahado di Azia Restaurant.
Porfin por bin claridad
Ta spera cu awor cu a detene tur e sospechosonan envolvi den e caso, cu porfin por bin claridad riba ken a bringa, ken a destrui muebles den e luga, ken a tira boter y ken a corta e chef di e restaurant. No por keda sin señala cu e caso a tuma mas tempo cu normal pasobra tabatin presion politico, sino di masha simannan caba tur e bringadonan lo tabata tra’i tralie.
