E concept rapport riba e operacion di Stichting Algemene Bejaardenzorg Aruba (SABA), ta cla. Sinembargo esey no ta nifica cu tin un conclusion ainda. Falta un parti ainda pa scucha e partidonan envolvi. Esaki ta loke cu Ursell Arends, Minister encarga cu Asunto di Adulto Mayor, a duna di conoce den un conferencia di e partido cu e ta representa, esta RAIZ.
For di dos aña pasa e dicidi di laga haci un investigacion riba e aspecto financiero. Esaki tabata relaciona cu e echo cu gobierno di un banda ta bisa di a manda placa pa SABA pa pago di un suma atrasa na e empleadonan, e famoso Rechttrekking. SABA di su banda ta bisa cu e no a haya e placa.
Aña pasa a menciona cu e rapport a keda cla pero despues di esey no a tende nada mas. Aunke no a menciona e rapport mas, mientrastanto e director den forma silencioso a entrega su retiro y bay na luna di februari.
Aunke cu e tabata den un conferencia di e partido RAIZ, e minister a splica cu na e momentonan aki e rapport ta den fase di “hoor en wederhoor”. Esaki ta nifica cu e dos partidonan envolvi, Gobierno y SABA, ta haya e rapport pa duna nan comentario riba dje.
Loke e por a bisa tambe ta cu e mes no a ricibi e rapport ainda. Si den forma regular ta haya presentacion mescos cu dirigente, raad van bestuur y hunta di supervision di SABA, di con e investigacion ta avansando.
E ultimo informacion ricibi ta cu a finalisa cu e prome fase y tin un concepto cla pa entrega na e partidonan. Despues cada un duna nan comentario riba loke cu a descubri, ta yega e fase pa e rapport bira publico, entre otro entrega na Parlamento tambe. “Nos lo tabata kier pa e rapport aki ta cla caba, pero e tin un proceso pa cana.”
