E proyecto di Fast Ferry entre Aruba, Corsou y Boneiro a keda un soño. Mientras cu Corsou y Venezuela ya caba ta den deliberacion pa ferry, aki na Aruba, cos ta manera drumi un soño basta largo.
Ainda ta fresco den nos memoria cu ex-minister di transporte Chris Romero a haci tur posibel pa por a firma un MoU cu Corsou pa tin un Fast Ferry entre e islanan ABC, kibrando asina e monopolio di tarifa halto di pasashi aereo, cual por cierto ainda ta asina. E tempo ey, nos ta bayendo bek na 2018, ex-minister Romero a indica cu Corsou tabata hopi interesa den e joint-venture aki y hasta Camara di Comercio e tempo ey a bisa cu un Fast Ferry lo trece bida na San Nicolas.
Finalmente dia 21 di december 2018, ex-minister Romero a firma un MoU pa realisacion di e Fast Ferry cu e ex-minister di economia, Steven Martina. Esaki a tuma luga durante un evento basta grandi na Cosecha na San Nicolas, den presencia di diferente dignatario.
E ex-mandatario, pa realisa e MoU aki, a sinta cu entre otro cu ex-minister Martina mes, ex-Minister Zita Jesus-Leito y ex-Prome Minister Eugene Rhuggenaath.
For di e rapport FOICE a haya indicacion cu e Fast Ferry lo mester a sali for di Barcadera, pero ex-Minister Romero a propone y dicidi p’e sali for di San Nicolas. Saliendo for di e punto di bista aki, e idea pa articula e San Nicolas Ports Authority a nace, di cual su ley ta na Departamento di Legislacion actualmente (no sa si ainda ta trahando riba dje pasobra ya nos ta 5 aña mas leu).
E siguiente paso ta pa traha riba un samenwerkingsconvenant, cu ta un documento huridico, unda tur aspecto di preparacion p’e proyecto ta documenta. E realisacion di e convenant aki ta dura 6 pa 8 luna. Despues, hunto cu Corsou, lo dicidi ki compania lo bira e operador y asina cuminsa e preparacionnan fisico, esta construccion di e terminal di Fast Ferry, cu lo transporta hende, auto y carga entre Aruba y Corsou.
UN PROYECTO ON HOLD
Pero, ainda, den 2023, e proyecto aki ta den pipeline. Prome cu eleccion na 2021, a puntra ex-minister Romero con leu e proyecto aki ta y el a contesta cu e idea aki tabata for di 2013 of prome caba na parlamento.
Na 2018 a logra bin hunto cu Corsou, unda cu a sinta hunto cu ex-minister Martina, a firma un MoU pa esaki
.
Na 2018, unabes cu esaki mester a cuminsa cana, loke a pasa na 2019, e minister a hay’e den diferente reto cu e mester a pasa. Esey a pone cu entre Aruba (ex-Minister Romero) y Corsou, a bay riba un ‘hold’. E no por a sigui cana pasobra e minister concerni, no tabat’ey.
Esun cu a sigui’e, no tabata mucho na altura di e asunto y el a para 2019 completo. Pa ora cu kier a cuminsa bek, e pandemia a drenta. Tabatin un aña ta prepara, combersando cu migracion, polis, tur esunnan concerni, y interesadonan cu ainda t’ey. Aworaki sa den ki situacion ta awor aki. Fast Ferry ta keda un posibilidad cu kier haci pa futuro.
Pero dado e circunstancianan a pone cu tin un retraso. Awo e pregunta crucial ta, Aruba por fin lo haya un Fast Ferry cu lo conecta cu e islanan ruman, of e ta keda simplemente ‘Den Pipeline?”
