Kico ta un cherchado? Un cherchado ta un persona cu ta desafia y renuncia na e palabra di Dios pa e no aplica y obedece na dje.
Ora bo trata di coregi un cherchado, e ta rabia cu bo pasobra e no kier bo mete den su bida, Proverbionan 9 vers 8 ta siña nos esey bisando: No reprende un hacido di bofon pa e no odia bo, reprende un hende sabi y e lo stima bo.
Cuanto biaha bo ta trata di acerca un persona, cu ta riba e caminda di maldad y inmoralidad, pa asina e bini na Cristo Hesus y biba drechi, e ta contesta cu un tono arogante, “ Ami ta bon”.
Un cherchado ta e palabra di Dios so por cambie, si e kier habri su curason y arepenti,y bira lomba pa maldad.
Un cherchado ta bay contra di e naturalesa, autoridad y creacion di Dios, pasobra e kier cambia locual Dios a inicia. E sistema di mundo ta cambia ley y troce e palabra di Dios pa pica por avansa.
Hopi hende ta duna nan cooperacion na un cherchado sin sa cu ta contra Dios nan ta bay, pasobra un cherchado por hala hopi hende su tras y bira un piedra di trompica. (Romanos capitulo 1 vers 18 -32 y capitulo 2 vers 5-8).
E asunto di cherchamento di Dios ta algo hopi serio cual ta para skirbi den e buki di Judas capitulo 1 vers 3+4 +7 y 17-20, pero e palabra ta recomenda nos pa persevera y keda para firme (Judas 1 vers 20+21).
Kico ta pasa ora un hende ta bay contra e naturalesa di Dios y Su creacion? Awel, e persona ey ta bira un persona perverso y cu e diabel ta dirigi su mente den inmoralidad.
Cada biaha cu nos, como mayor, permiti nos yiunan haci cosnan caminda nos sa masha bon cu ta contra boluntad di Dios, nos a uni cu nos yiunan pa chercha Dios.
E palabra ta fuerte, pero a yega tempo pa tur hende sa e berdad,y haya temor di Dios, pasobra diabel ta haciendo fiesta den cas di hende, treciendo tur sorto di bagamunderia, pasobra e plan di diabel ta pa horta, mata y destrui.
Un yiu cu sa masha bon cu e mester honra su tata y mama y ta haci lo contrario, no solamente ta haci su mayornan tristo, pero e ta un cherchado. P’esey e promesa di Dios ta pa tur mucha, pa nan honra nan mayornan y tur cos lo bay nan bon.
Pero e plan di e malvado ta pa siña e mucha pa chercha, rechasa bondad, rechasa amor, rechasa palabra di Dios, rechasa autoridad y asina e hoben ta perde su integridad y si e no arepenti e por perde su futuro.
Den Eden e colebra a chercha y Adam y Eva a cay aden. Awendia e bendedo di droga ta bisa e hoben mi ta duna bo un tiki pornada, pa asina e tin un cliente adicto mañan. Y te ainda hopi no kier compronde cu esun cu ta ofrece bo droga no ta un amigo sino un cherchado.
Salmo capitulo 14 ta bisa; E bobo a bisa den su curason cu no tin Dios, nan ta corumpi, nan a comete echonan abominabel,no tin hende, cu ta haci bon.
Si un hende ta ofrece bo algo cu e sa cu ta haci bo malo, e persona ey ta un cherchado.
Laga nos haci manera Salmo 1 ta bisa nos.
