Riba e ultimo dia di aña tin e tradicion cu Wind Creek Aruba ta cende e pagara mas grandi den centro di ciudad. E biaha aki no tabata un excepcion. Tur cos a cuminsa alrededor di 1:00 pm ora cu a cende e pagara pero djey a sigui c’un tremendo ambiente na Renaissance Marketplace. Pueblo a goza un mundo di e pagara di seis miyon tiro. Pero a disfruta mas dei e ambiente cu Robert Jeand’or y su Solo Banda Show a pone.
Paul Gielen, General Manager di Wind Creek Aruba ta comenta: “Nos ta sumamente contento con e aña 2023 a bay. Nos a termina cu e renobacion di e camber nan di Renaissance Ocean Suites como tambe Renaissance Convention Center completo. E tradicion di nos pagara ta pa core cu fuku y habri un aña nobo cu hopi prosperidad.
Pa 2024 nos lo sigui focus riba nos servicio, nos comunidad, como tambe riba e bienestar di nos empleadonan. Nos ta sumamente orguyoso di a wordo nombra “Renaissance Property of the Year” den e region di Caribbean y Latin America. Nos restaurant L.G Smith’s Steak & Chop House tambe a wordo nomina pa TripAdvisor como e “ Best of the Best Restaurant for fine dining in the Caribbean”. Esaki ta muestra di dedicacion di nos empleadonan como tambe un estimulo pa sigui engrandece e turismo di Aruba.”