Cada biaha c’un organisacion deportivo mester biaha, sea pa representa nos pais of forma parti di un training camp, esaki ta trece su retonan financiero cu ne.
Pa e motibo aki tambe, Aruba Soccer Academy (ASA) a tene dos evento pa asina recauda fondo pa nan por biaha cu e hungadonan di ASA pa Miami pa un torneo internacional. Quincy van Aaften, Assistent di Coach, a indica cu ambos evento tabata exitoso. E 4×4 tabata un exito total y te ainda tin mas hende ta pidi pa ripiti e evento aki, unda cu mas di 35 ekipo a participa. Ta danki na e dos torneonan aki, cu e muchanan por ta riba avion diabierna y diasabra rumbo pa Miami.
Nan lo participa den un torneo, cual apertura lo ta diadomingo, pero nan prome wega lo ta dialuna, caminda cu ya pa 8:00am nan mester ta na veld caba, pa prepara pa nan prome wega.
Un total di 18 mucha lo ta biahando cu ASA, cu dos coach y tambe dos leidster. Den e torneo aki lo tin 10 team participando, entre otro, Merca, Republica Dominicana, Aruba y Colombia. Esaki ta ASA su prome biaha cu nan lo ta participando den e torneo aki.
December nan tabata na Colombia y tabata un experiencia inolvidabel, Quincy a indica. E nivel di futbol di Colombia no tin nada pa compara cu ne, ya cu nan ta hunga c’un intensidad tremendo. Y esaki ta loke nan a trece bek pa e muchanan na Aruba. Y nan lo saca cara di nos isla!
Pa loke ta expectativa, Quincy a indica cu semper nan ta inculca den e muchanan cu, pa bo have fun, bo mester gana. Y esey ta loke nan lo bay haci awo na Miami. Haci nan miho esfuerso pa gana!
E muchanan mes tin hamber pa gana, nan ta train cu curason y disciplina. Y como coach, esaki ta prioridad. Sin disciplina, bo no ta yega niun caminda. Y e muchanan tin esaki, cual lo yuda e muchanan yega leu.
Presente n’e conferencia di prensa tabat’ey tambe, Minister Dangui Oduber, cu a bisa di ta sintie orguyoso di wak e muchanan con nan a desaroya desde e prome training, henter nan trayecto pa bay participa den un torneo prestigioso manera Miami Cup 2024, c’un gran cantidad di pais cu nivelnan halto di futbol.
Ta simannan di traning, practicamente tur dia, nan ta un bon seleccion y nan tin un bon sinergia. Ta muchanan cu a tuma tur nan tempo pa haya e tecnica necesario pa representa Aruba den exterior. E torneo aki ta uno internacional y ta bay ta un manera di mercadea Aruba tambe den exterior y e muchanan lo sa di saca cara di nos pais.
