Dia 1 di juni 2024 tawata Dia Mundial di Lechi, y luna di juni tawata dedica na e celebracion aki. Relaciona cu esaki Compra agente exclusivo di lechi Frisian Flag a organisa diferente actividad dedica na e tema aki.
A combersa cu Thixianne Wever kende ta encarga cu Sales & Marketing na Compra Ltd, y el a splica cu a organisa diferente evento durante luna di juni, entre otro: ofertanan special na supermercadonan riba productonan di Frisian Flag. Riba 9 di juni a organisa un dia recreativo pa e muchanan na Neptali Henriquez Park, entre otro: competencia pintamento pa mucha, tasting, dino jump y mas.
Riba diahuebs 27 y diabierna 28 di juni a pasa na diferente scol na Aruba y a entrega un dushi desayuno pa e muchanan. Ademas di desayuno a entrega liniaal, kleurpotlood y crayon cu e muchanan por pinta riba e caha di desayuno.
Durante lunchbreak e muchanan a disfruta di un sabroso lechi di Frisian Flag. Wever a indica cu Compra lo sigui organisa evento special. Lo scoge cada aña diferente scol pa participa na celebracion special.
Solangel Dinmohamed-Laclé kende ta maestra na Scol Primario Kudawecha, ta elogia e iniciativa di Frisian Flag cu ta duna un aporte positivo na e nutricion di e muchanan. Ademas ta importante pa e muchanan siña e importancia di comparti y yuda den comunidad. Dinmohamed-Laclé a mustra cu e ta spera cu mas compania por uni na e bunita causa aki.”
