Den fin di siman tras di lomba tabatin diferente fiesta rond Aruba. Hasta tabatin un Halloween Party pa e mascotanan di cas. Shohaira da Silva ta e persona tras di e evento aki.
Esaki ta di cinco aña sigui cu Bestial Pet Shop ta organisa e evento Pet Halloween Costume Party. E bunita ta cu e di cinco celebracion a conta cu cincuenta participante.
Shohaira tabata hopi entusiasma pa e creatividad cu por a mira durante e evento, unda cu doño di e mascotanan a haci hopi uzo di nan creatividad.
Pa haci e evento mas grandi a pone un premio efectivo di 200 dollar pa e maximo ganado, ademas di e shete premionan cu tabatin den forma di producto. Tabatin participante cu tabata pendiente caba, ya cu e ta un actividad gratis. P’esey normalmente prome cu e evento tuma luga nan ta “sold out” caba y e aña’ki no tabata diferente. Hasta mester a traha cu un lista di espera.
El a bisa cu normalmente ta scucha cosnan negativo so, pero e evento a demostra cu “Aruba ta stima su mascota. Na un evento asina ta haya sa con e hendenan ta stima nan bestia. Hopi biaha ta nota e partinan negativo den social media pero Aruba ta stima su bestianan,” el a bisa.
