“Awe mi kier anuncia mi continuacion den politica. Tabata un paar di luna di reflexion extenso tras di lomba. Mi a uza e tempo pa refleha ariba experencianan di pasado, pa mi por alcansa un miho version di mi mes. Un version unda mi por sirbi mi Pais y e diesseis mil hoben y tur otro hoben adulto y hoben adulto mayor”, asina Leonardo Figaroa a anuncia.
E ultimo aki a participa como candidato # 14 riba lista di Partido Accion 21 durante e eleccion dia 25 di juni 2021. Aunke e tabata e ultimo candidato riba e lista, el a logra 190 voto riba su nomber y asina hacie e di tres politico cu mas voto riba e lista, despues di Mansur y Lejuez. Pero problema interno a haci cu e no a keda mas cu Accion 21.
Recientemente el a bay notario y a funda un partido politico nobo. Na unda e no a divulga ni e nomber di e partido, ni tampoco kende(nan) ta uni cu ne den e organisacion.
“Mi ta kere firmemente cu Aruba mester di un vision cu perspectiva y pesey awe cu gran placer mi por anuncia cu Aruba lo ricibi un lider politico hoben, e lider politico di mas hoben cu 21 aña. Aruba mi ta kere den un vision unda mester crea mas lider, unda nos cuidadanonan mester ta bon informa pa por forma parti di discusion y foro politico.”
Durante e ultimo 5 añanan di gobernacion, hopi proceso a bay robes. Y na final hopi decision tuma no a sali na beneficio di e pueblo Arubano. “Mi kier convence bo cu hunto nos por logra crea e vision cu perspectiva nobo pa crea solucion cu nos tur ta desea.”
Su enfoke ta riba e lucha cu nos tin comun cu otro, no obstante diferencia di pensamento y ideologia politico. Nos tur ta desea progreso pa Aruba.
“Mi kier haci mas pa modernisa nos democracia, mi kier wak un sistema mas husto den enseñansa basa riba 21st century skills y respet pa maestro cu ta creando lidernan tur dia. Mi kier mira mas pa nos Medio Ambiente pa proteha nos isla. E ta crucial pa tin opportunidad laboral y crecemento economico unda tur persona ta haya e oportunidad pa crea stabilidad financiero. Un sistema di salubridad publico cu ta realmente traha di forma preventivo.”
Vision pa politica
Su vision ta pa mira un Aruba cu ta yuda crea oportunidad pa tur hende, pa tin un gobierno cu su checks and balances pa asina e grupo cu a perde confiansa por haya esaki bek.
-Mi kier wak hobennan prospera
-Mi kier wak un clase medio solido
-Mi kier wak e clase trahado miho protehi
-Mi kier wak docente, enfermero, polis, brandweer, dokter y specialista ricibi mas respet di parti gobierno
– mi kier wak pensionadonan biba den trankilidad
Su vision tin como punto di salida pa tuma e curashi di crea un economia innovativo, nobo y moderno. Pa enseñansa haya mas inversion pa sigui prepara lidernan cu awe ta den desaroyo. Pa tin un balansa entre prosperidad economico y e consecuencianan ecologico. Pa empodera cada ciudadano pa alcansa nan miho version, pa hunto nos crea lider.
Dicon continua den politica?
Politica no ta facil, vooral awe ora mira con debatenan ta keda reduci na nivel di atake personal y bullying. “Mi ta puntra mi mes ta con nos hobennan por haya un bon ehempel for di nos mandatario(nan) y parlamentario(nan) cu en bes di enfoca riba contenido, ta gasta nan energia den insulta, rebaha y ataca otro.”
