Diasabra dia 9 di juli, varios colega di Headlines Group a atende un curso organisa pa Coordinatiecentrum Mensenhandel en Mensensmokkel Aruba (CMMA). Meta di e presentacion tabata pa sa e diferencia y similaridad entre mensenhandel y mensensmokkel. Den esey a repasa y brinda guia den con e rol di media mester ta den e fenomeno di traficacion y contrabando di hende. Tambe a analisa con lo ta e miho manera pa prensa atende cu esaki.
E sesion tabata den man mr. drs. Jeannette Richardson-Baars, hunto cu dos experto y representante di United Nations Office on Drugs and Crime (UNODC), como parti di e Track4Tip Program.
E programa Track4Tip ta un iniciativa di tres aña largo (2019-2022). UNODC a cuminsa cu esaki cu sosten di e Oficina TIP di e US State Department (Departamento di estado di Merca). E proyecto ta beneficia ocho pais di Sur America como tambe di Caribe, cu diferente accion nacional y regional na Ecuador, Peru, Brasil, Colombia, Republica Dominicana, Trinidad and Tobago, Corsou y Aruba.
Durante e presentacion a comparti hopi informacion y a haci comparacion di varios caso cu ta sosode aki na Aruba como tambe den exterior.
Obhetivo general di e proyecto aki ta pa por haya un miho contesta for di husticia na momento cu ta trata un caso di traficacion di hende. E obhetivo tambe tabata pa tin enfoke riba e victimanan. No tur ora e “ilegal” ta un mal hende, pasobra specialmente den traficacion di hende, por considera nan como un victima. Den caso di contrabanda di hende, manera ora grupo yega den boto na Baby Beach pa purba yega na e “soño Rubiano” cu nan no ta victima, sino ta practica contrabanda di hende. Tur den e boto no a comete un crimen, sino a burla di leynan administrativo, pa cual ta wanta nan na Guarda nos Costa y deporta nan bek. Pero e capitan, esun cu ta facilita contrabanda di hende, si ta bay cera y lo present’e dilanti hues pa un veredicto penal.
Headlines Group, e cas editorial di 24ora.com y TREMPAN ta gradici Jeannette Richardson-Baars pa e invitacion.
